孖緋聞男友遊夜市態度親暱 大馬女神林明禎拒認戀愛中

大馬女神 林明禎 最近喺台灣工作時，被網友發現同緋聞男友同遊當地夜市，男方仲伸手搭住明禎膊頭態度親暱，疑似戀情更再一次成為網絡熱話。明禎呢日喺香港現身活動時，當然被追問而家嘅感情狀況啦。

林明禎日前被發現同緋聞男友同遊夜市
面對傳媒嘅逼供，明禎就不停以「朋友」稱呼緋聞男友，透露對方咁啱放假去台灣旅行，所以相約食飯同逛夜市，更強調呢次嘅約會係光明正大，日後揀見面地點會小心啲。
呢日佢現身活動就拒認戀愛，又指當晚約會光明正大

至於被男方搭膊頭一事，明禎就似乎有備而來，仲用人有三把火呢個比喻嚟做擋箭牌：「人有三把火，他見我這(膊頭)把火快要熄，所以幫我遮一吓。」明禎又坦言「朋友」出於紳士行為，因為人多搭膊頭拉佢一下，先會俾人影到喎。
人有三把火老人家唔係話唔拍得咩？！

明禎雖然已多次被傳出蜜運，但係每次都堅稱自己仲未拍拖，究竟幾時先肯封盤，佢就話唔急，暫時以工作為先，一切順其自然。