林文龍夫婦罕有現身公開活動 郭可盈期待遇好劇本復出

11月27號係 郭可盈 嘅正日生日，呢日佢孖住老公 林文龍 現身公開活動，可盈淡出娛樂圈之後就專心照顧家庭，平時只會喺社交平台分享近況。問到文龍有冇準備驚嘉畀太太時？佢就話驚喜就日日都有，工作完咗之後就會合囡囡一齊食飯慶祝。

郭可盈生日仍同老公一齊現身活動
最近可盈罕有現身內地登台，佢解釋係緣份安排，加上時間配合到，而活動又有意義，兼且可以跟粉絲見面。當問到有冇意思接拍劇集同電影時，佢就話一直都期待遇到合適同好劇本，身旁嘅老公就大力支持，佢話都活到就嚟登六，應該好好享受每一日，最重要係開心。至於會否考慮夫妻檔拍劇時，兩夫婦異口同聲話有啲難度，可盈話擔心會發生枝節問題。
日前現身內地登台嘅佢，仲唔排除會再現身幕前嘅可能

兩人14歲嘅囡囡遺傳咗媽咪嘅美貌，假如有人邀請囡囡作幕前演出，林文龍就話唔抗拒，只要適合囡囡年紀就可以，等囡囡可以開眼界，但要以學業為先，不過講到囡囡拍拖相關問題，文龍就擰頭話唔講呢啲問題，可盈忍唔住笑話「嗰個係佢前世情人。」
而文龍就提到囡囡入行可以開眼界，不過拍拖就免問

同場出席仲有蘇志威同準新人郭子豪同鄧卓殷，之前以佛系心態籌辦婚禮嘅子豪同Amber，見到下年4月婚期逼近，佢哋都唔敢再拖，請咗人幫手籌備大日子事宜，Amber亦定咗姊妹團名單，佢哋又透露會去清邁影結婚相。

郭子豪同鄧卓殷明年4月就會舉行婚禮