往事只能回味丨劉家昌創作無數經典作品 2006開騷獲劉德華成龍陳慧琳群星支持

資深音樂人劉家昌於12月2號因病逝世，享年81歲。劉家昌創作嘅音樂作品無數，根據佢本人自述，佢所創作嘅歌曲大約有二、三千首，更有唔少係傳唱度極廣嘅經典金曲。而家就回顧劉家昌2006年喺香港舉行《往事只能回味：劉家昌音樂會》嘅精彩片段，細聽佢嘅好歌。 

音樂會表演歌手及捧場嘅藝人陣容強大，華仔唱《月亮代表我的心》。

音樂會表演歌手及捧場嘅藝人陣容強大，當中包括成龍、劉德華、周華健、許志安、陳奕迅、蘇永康、容祖兒、鄭嘉穎、陳松伶、鄺美雲、陳慧琳、古巨基、甄妮、尤雅、胡杏兒及廖碧兒等。成龍形容呢個音樂會似朋友聚會，性質似聚會多過演唱會。 

成龍形容呢個音樂會似朋友聚會，性質似聚會多過演唱會。

音樂會當晚出席嘅歌手、藝人各自分享佢哋對劉家昌嘅印象，蘇永康稱4歲已識唱《往事只能回味》，鄺美雲讚劉家昌聲線好迷人好sexy，而成龍笑言：「邊個同劉家昌合作過，劉家昌作歌畀邊個人唱，嗰個人一定紅，一定大紅大紫。」甄妮同劉家昌多次合作就話：「佢真係有技巧，真係可以教到我哋嘢。我覺得自己好幸運。」至於有幸唱到劉家昌20幾年嚟新作《無可奈何》嘅鄭嘉穎就非常感恩：「好多謝老師，成個演唱會只有一首新歌畀我唱，呢樣嘢都係好大嘅感激。」 

Joey演唱《海鷗》時，劉家昌更同佢一齊合唱。

喺音樂會上，劉家昌同一眾歌手演繹《在雨中》、《五月的花》等歌曲，當華仔演唱《月亮代表我的心》及成龍演唱《往事只能回味》時，劉家昌亦有現身舞台。而喺Joey演唱《海鷗》時，劉家昌更同佢一齊合唱。

鄭嘉穎唱劉家昌20幾年嚟新作《無可奈何》。

最令一眾觀眾歡喜嘅就係聽到劉家昌同合作無間嘅尤雅合唱《在雨中》一曲，當晚每首經典金曲都勾起唔少人嘅昔日回憶。 劉家昌自述：「我天生不是一個喜歡在幕前的人，我做老師在幕後，我覺得輕鬆很多，沒有壓力。」而完成音樂會後，佢非常滿足，再加上得到多位好友支持，令佢非常感動：「我覺得很感動，這麼多有名的頂尖藝人，大家都來幫我。我沒有話講，我覺得我這一生已經夠啦！」

蘇永康稱4歲已識唱《往事只能回味》。

甄妮同劉家昌多次合作就話：「佢真係有技巧，真係可以教到我哋嘢。我覺得自己好幸運。」