梁詠琪完成Side Track音樂會覺人生解鎖 歌迷拒離座臨時加唱《灰姑娘》

梁詠琪（Gigi）一連五場Side Track音樂會日前完滿結束，寵粉嘅Gigi特別為尾場觀眾額外送上《哭了》以及自己作曲嘅《同班同學》，不過現場觀眾依然意猶未盡，完騷仍拒絕離場，不斷嗌encore，搞到Gigi都唱到唔捨得走。

今次音樂會以「回憶」作為主軸，每晚Gigi喺台上分享唔同嘅昔日珍藏。
喺歌迷嘅期待下，最終Gigi再度上台，喺音樂總監趙增熹嘅即興鋼琴伴奏下獻唱經典歌《灰姑娘》，為五場音樂會以全場大合唱完美落幕。 Gigi完成人生第一個廣東歌Side Track音樂會，第一次喺演藝劇院做音樂會，覺得好特別係「人生解鎖」，今次歌單特別有感覺，揀嘅成長三步曲；揀歌方面自己就好滿足，歌迷依然有海量嘅要求。 

Gigi完成人生第一個廣東歌Side Track音樂會，覺得好特別係「人生解鎖」。

雖然場地呈半圓形，但有四面台效果，Gigi笑言根本冇位匿，尤其第四晚唱《迴旋木馬的終端》時，Gigi被歌迷感動落淚，工作人員遞紙巾畀佢抹淚擤鼻涕，即使背向觀眾，依然被睇得一清二楚。而喺第四、第五場亦令Gigi感到最難忘嘅兩場，皆因太投入整個舞台表演而感動哽咽，好多感覺湧上心頭，Gigi好感恩歌迷一直陪伴佢經歷人生每個時刻：「呢幾晚我哋一齊製造咗一個回憶嘅畫面，用『感動』都形容唔到，係大家一齊陪我經歷咗這個過程的那種滿足感同開心。」 

呢啲舊照全部都係Gigi同歌迷嘅美好回憶。

今次音樂會以「回憶」作為主軸，每晚Gigi喺台上分享唔同嘅昔日珍藏，包括19歲初入行時為日本雜誌《少年JUMP》拍攝嘅封面，20歲時到非洲拍攝嘅寫真集《赤道の燃燒》、一頭長髮造型拍攝嘅手錶廣告、第一套參與嘅電影《流氓醫生》影碟、1996年首張個人廣東碟簽唱會報紙全版廣告，呢啲全部都係Gigi同歌迷嘅美好回憶。

Gigi好感恩歌迷一直陪伴佢經歷人生每個時刻。