旦哥當年被劉家豪嫌「戲屎」邀睇新戲後即場獲平反

鄭丹瑞 同 盧慧敏 主演嘅《得寵先生》上映兩星期，旦哥仲獲好友連炎輝包場，邀請資深電視劇監製 劉家豪 同太太 梅小青 ，仲有當年合作主持《勁歌金曲》嘅盧敏儀，加上羅蘭、余慕蓮、吳麗珠、譚玉瑛、黃允財、李龍基、杜燕歌等老友記一齊捧場。

連炎輝包場邀請大班好友欣賞阿旦主演嘅新片
旦哥亦親自招待各位好友入場，謝票時仲坦言最開心係邀請到家豪哥欣賞，又為自己初入行拍劇被嫌「戲屎」平反，而散場後家豪哥仲大讚旦哥演活「佳叔」。
旦哥喺現場話：「今日好多前輩嚟捧場，最開心見到劉家豪先生同小青姐，我同家豪哥有段恩怨，所以特別點名邀請佢嚟睇戲。話說我入行喺麗的電視接到一個劇本《新大丈夫》，演林嘉華細佬。當時由劉家豪編導，我拍咗3集之後就冇再接到劇本。劇組話我太高，麗的布景又太矮，成日穿崩，我信咗！」
周身刀嘅旦哥，仲爆出當年曾被金牌監製劉家豪嫌戲屎嘅故事

豈料後來旦哥追問後先知真相：「佢哋話：『劉家豪話你啲戲屎呀！』呢件事擺咗喺度幾十年。」而家豪哥就喺觀眾席上大叫平反，之後話：「阿旦真係一個勵志故事，當年表現得唔好，但佢發奮圖強，天天向上。到《得寵先生》我折服，佢嘅演出令我嘆為觀止，完全唔係以前鄭丹瑞嘅演法，唔會覺得佢係鄭丹瑞，只覺得佢係『佳叔』。佢犧牲好多，佢對狗狗有敏感，我都經歷過，佢能夠跨越呢關去演『佳叔』，下咗唔少苦工。」
家豪哥呢日就話要為阿旦平反，仲大讚佢佳叔嘅角色非常傑出

而羅蘭姐就拖住Amy一直問佢：「成套戲真係好感人，好好睇。拍嗰陣辛唔辛苦呀？夏天喎！」受寵若驚嘅Amy就話：「少少，但睇到拍出嚟成果就好值得」。Amy同導演兼編劇李志偉亦參與由「香港盲人輔導會」舉辦嘅「口述映像」特別場。
Amy同導演亦參與口述映像特別場

透過耳機聽專人旁述嘅Amy期間多次掉淚，事後仲指感覺更細膩感動：「我第一次欣賞口述映像，感覺好特別，雖然眼嘅感官閂咗，但其他感官更敏感，電影配樂、所有好細微嘅聲音、演員嘅呼吸，作為觀眾睇會有另一個層次。因為只靠耳朵去聽、去感受，會更深刻，聽到更細微。而作為演員，我會聽到自己用聲、停頓位、節奏，係一個好特別嘅學習渠道。」

新片上映兩周大收熱烈口碑