麥明詩唔急住知BB性別 同老公盛勁傾好會生多個

懷孕6個幾月嘅 麥明詩Louisa 呢日同老公 盛勁為Keith 一齊出席活動，Louisa着住短裙大騷長腿，雖然頂住個大肚，但佢仍行得健步如飛，Louisa話自己陀B陀得咁舒服，都係多得老公悉心照顧，平時除咗叮囑佢飲食要均衡外，仲會督促同陪伴佢做運動；Louisa指自己嘅胃口好好，平時都係少食多餐，有時夜晚都要麻煩老公幫佢準備嘢食。

懷孕6個多月嘅麥明詩同盛勁為一齊現身活動

過兩日就係Louisa嘅33歲生日，大會就為佢準備咗蛋糕慶生，Keith亦都大方錫咗老婆一啖，其實佢哋兩公婆早前已經同家人一齊去咗旅行慶祝生日，Louisa話而家去到人生新階段，好感受到家人支持嘅重要，而呢次旅行亦令佢覺得相當暖心。Louisa仲讚老公好細心，旅程中幫手照顧佢嘅父母，不過Keith就話自己本身都同外父外母幾好傾，大家就好似朋友咁，所以都唔係刻意做出對佢哋好嘅行為。

早前佢哋全家人一齊出遊預祝Louisa生日
好多準父母都會心急想知BB嘅性別，不過Louisa就話媽咪陀兩胎都係到最後一刻先知BB性別，所以佢都諗住要秉持呢個傳統。Louisa同Keith都有兄弟姊妹，所以佢哋都話唔只想生一個小朋友，覺得咁樣小朋友嘅成長會開心啲，至於生仔定生女，佢兩個都話仔女都一樣咁開心喇！

Louisa仲話同Keith已經討論好將會生兩胎