東海銀赫聖誕亮燈五百fans逼爆 來港拋低男神形象大歎雞蛋仔

韓國男團Super Junior成員 東海 同 銀赫 組成嘅小分隊Super Junior-D&E，繼日前喺西九舉行完巡唱之後，呢日佢哋又出席一個商場嘅聖誕亮燈儀式，預早同粉絲一齊慶祝聖誕，吸引超過500名粉絲蜂擁而至，逼爆商場，場面墟冚。

東海同銀赫完成演唱會後留港出席活動
暖男東海同埋銀赫唔單止送上飛吻同大派心心，佢哋仲好親切咁用廣東話同粉絲打招呼，令全場粉絲high爆。
現場又安排唔少港式美食，兩人讚口不絕

東海同銀赫呢日嘅造型打扮亦相當應節，非常有聖誕氣氛，問到佢哋最難忘嘅聖誕節係點樣過，東海就大賣口乖話今年同香港粉絲一齊最難忘。而銀赫就回憶返初出道同東方神起一齊去遊樂園拍攝MV，仲現場哼咗兩句當時首歌。

難得嚟到香港，梗係要食吓地道美食，呢日大會亦特別準備咗麵包布甸、叉燒包同埋雞蛋仔俾佢哋，東海同銀赫不約而同話最鍾意雞蛋仔，仲拋低形象喺現場直接大快朵頤。