StarkTalk一氣呵成版｜何超蓮放下千金身段做牛雜妹 拍動作戲獲此沙兩度英雄救美

何超蓮 首度跨界正式拍攝電影，呢日佢接受我哋主播 王鎮泉 嘅《StarkTalk》專訪時，分享接拍電影始末同點滴。超蓮喺戲中飾演一位牛雜妹，橫誇10年嘅角色，佢話主要係得到大家姐何超瓊 邀請，加上睇完劇本覺得好鍾意題材，內容描述澳門回歸50周年，一位澳門出生嘅女仔。

首次演出電影嘅何超蓮，同此沙合作
電影由超蓮同內地演員 此沙 主演，傳聞中此沙係位好怕醜嘅暖男，一講到兩人嘅合作，超蓮話佢每逢一拍攝完鏡頭後就會爆笑，可能自己性格活潑健談打破咗對方嘅怕醜。超蓮仲感謝此沙照顧，因為有兩場戲，講述佢要喺斜路同平地喪跑，當時此沙叫超蓮唔使擔心發力去跑，結果兩次都一仆一碌，幸得此沙及時救美。

講到兩人嘅趣事時，超蓮就話自己係此沙人肉翻譯機，因為現場拍攝都係講廣東話，所以佢就全程做翻譯，更大爆此沙最叻係講「傻仔」兩字。
超蓮指今次係大家姐邀請佢參與演出

超蓮喺戲中仲會同前輩曾志偉上演父女情，最初佢都擔心招架唔住志偉嘅爆肚，但發現到片場後，每場戲佢都會搵志偉對稿，對方又悉心教導，令超蓮覺得好安心，反而志偉唔喺片場時佢會有啲膽怯。
志偉就會扮演超蓮片中嘅爸爸

而另外一位對手則係黃宗澤Bosco，對方百忙中抽空拍攝，兩人最多共同話題係講食宵夜。超蓮原來視宵夜為動力，每晚捱夜一定要食宵夜，唔係就會好眼瞓，最記得拍攝時經常孖Bosco食腸粉、蠔餅等美食。
片中佢同此沙發展出一段愛情

為咗投入牛雜妹角色，超蓮開戲前專登去北京學演戲，又到香港同澳門牛雜舖學剪牛雜，笑言一啲都唔容易，但現時佢可以剪到一碟似模似樣嘅牛雜出嚟，希望觀眾會鍾意佢個角色。
超蓮唔止拍攝前到北京學習演戲，仲話希望可以成為一名打女

首次拍電影雖然辛苦，但超蓮一啲都唔介意，仲希望將來有機會做打女，因為覺得完成角色後好有成功感。另外佢又表示演員中特別欣賞佘詩曼Charmaine，因為阿佘曾經同竇驍合作拍劇，超蓮前往探班時見識阿佘一秒入戲嘅厲害。