韓馬利拍打戲拍到嘔被李家鼎鬧蠢到死 與老公結婚35年性格南轅北轍

韓馬利（Mary姐）早前獲TVB頒贈30周年金牌，近日接受電台節目訪問大談入行經歷，韓馬利自細熱愛跳舞，入行前曾做一名舞者，當時佢父母認為跳舞冇出息，後嚟韓馬利被母親送去英國留學，一年之後佢獨自買機票返港，令母親非常生氣，跟住加入TVB做PA，其後轉到幕前發展。

韓馬利前獲TVB頒贈30周年金牌，近日接受電台節目訪問大談入行經歷。
Mary姐當年喜歡跳舞，不過佢媽咪係教書，覺得阿女有書唔讀去跳舞冇咩發展：「佢反對之下好民主，而且我細個代表好多學校去攞獎，又代表全香港去比賽，喺1970年代表日本世界博覽會喺香港館表演，我同查理斯王子影過相㗎！」

Mary姐當年喜歡跳舞，不過佢媽咪係教書，覺得阿女有書唔讀去跳舞冇咩發展。
Mary姐後嚟喺英國輟學返港，開始幫周梁淑怡阿女補習：「我媽咪同佢講，話個女讀唔成書好冇用，Selina話你不如入TVB做PA。見工嗰個係孫郁標，佢見我跳舞攞咁多獎，唔跳就嘥咗，咁啱公司唔夠舞蹈員，佢問我可唔可以去跳舞，但我媽咪就係唔想我跳舞，點知Selina出口，我媽咪就應承畀我跳一年，PA有位就轉番過去。之後就好自然轉到幕前，真係無心插柳柳成蔭。」

Mary姐於1976年首次拍劇喺《陸小鳳》擔任女主角飾演上官丹鳳。
Mary姐於1976年首次拍劇喺《陸小鳳》擔任女主角，目前仍活躍喺影視圈發展，當年未入過訓練班嘅Mary姐，自爆曾被李家鼎鬧得最多，「以前拍功夫片，有一段時間好鍾意用拳腳，全部都係自己做冇替身，除咗吊威吔或者好高跳落嚟，嗰時邊有學過，臨時拍臨時學，入到廠學完要即刻拍，你知李家鼎幾咁惡，我直情打到出廠嘔，嘔完仲要畀佢鬧蠢到死；不過佢個人心地好好，好關心人，只係性格係咁」。

Mary姐當年未入過訓練班，自爆曾被李家鼎鬧得最多。
Mary姐與老公杜燕歌結婚35年，笑指與丈夫簡直係南轅北轍，無論係思想、生活習慣、鍾意嘅嘢都完全唔一樣，冇拗撬嗰陣就好，如果碰到底線，Mary姐直言會發火，咁大家就唔出聲，三十幾年時間由好難磨合到而家彼此尊重對方，一直恩愛。

Mary姐與老公杜燕歌結婚35年，笑指與丈夫簡直係南轅北轍。