孫藝珍婚後首公開亮相撐老公送愛的鼓勵 心疼玄彬努力拍戲臉頰變消瘦

韓國男神玄彬、趙祐鎮、全汝彬及李棟旭等主演嘅新片最近舉行VIP首映禮，吸引大批圈中好友撐場，孫藝珍首次高調亮相支持老公玄彬新作，二人自2022年結婚後，兩公婆甚少一齊公開現身，孫藝珍呢次為咗撐老公真係做到足，佢又隔空向老公送上愛的鼓勵，恩愛放閃！

玄彬演出嘅新作上畫，呢日舉行VIP首映禮

除咗玄彬之外，趙祐鎮、全汝彬及李棟旭等都有參與新片演出
孫藝珍甜蜜發言叫老公加油，惹嚟在場圍觀嘅人士尖叫，佢話見到老公拍得咁辛苦，旁邊睇都覺得好心疼，明顯見老公塊面消瘦咗，自己同樣身為演員都理解呢種辛苦，明白老公付出咗咁多努力，相信會打造出一套好嘅電影。

婚後甚少同老公合體嘅孫藝珍，呢日亦現身力撐老公