慈善星輝仁濟夜｜思捷麥包組280歲男團上陣 婉婉探訪再與受助者同台演出

年度大型籌款節目《慈善星輝仁濟夜》星期六晚就會舉行，當晚翡翠台亦會直播演出，呢日嘅記者會更公佈表演陣容， 而由 李思捷 麥長青 黃智賢 曹永廉 同 唐文龍 組成《Hey Brother》亦會初登場，思捷同麥包仲話已經足足準備兩年咁話。

思捷同麥包仲有幾個佬組成嘅Hey Brother星期六晚就會同大家見面
加埋足足有280歲嘅佢哋，麥包仲笑指可以嘗試申請世界紀錄，因為相信唔會有男組合加埋咁大年紀先出道咁話。佢仲話幾位成員都係唱得又跳得之人，想睇就記得留意當晚節目喇。
車婉婉、Aska同Plan V都會參與今次慈善演出

而 車婉婉 早前就親身探訪，當晚亦會同受助者一同演出，早前佢就帶埋囝囝一齊飛到美國登台，騷後順道探訪哥哥，仲過埋白色生日，所以話2024年嘅美滿收尾呀。入圍台慶頒獎禮最佳主持嘅婉婉，又話入到最後五強已經當攞獎，而假如真係有幸得獎，就會係完美嘅生日禮物呀。
婉婉同Aska早前更親身探訪受助者了解

張馳豪同婉婉一樣有探訪受助個案，而Plan V嘅幾位成員就會同中學生大合唱，多人合體希望可以令善款節節上升呀。