星州拍綜藝祖兒鼓勵挑戰食榴槤 阿Sa一咬果王即作嘔老友狂笑

由 容祖兒 蔡卓妍 鍾欣潼 參與嘅內地綜藝《因為是朋友呀2》第二站出訪新加坡，三姝一抵達當地就立即接到任務，以抽籤方式決定旅費，一齊品嚐當地知名美食同景點，節目組仲指定阿Sa擔任財務總監。

祖兒、阿Sa同阿嬌早前到新加坡拍攝
而被委任為「財爺」嘅阿Sa竟長嘆一聲，原來佢自小學三、四年級開始，數學就從未合格過，難怪阿Sa都話唔明節目組：「揀一個數學最差嘅人做財務總監。」
抽籤後祖兒得到$9.9、阿Sa就有$19.9、；而阿嬌則抽到「銘謝惠顧」，即係一蚊都冇‧由於祖兒同阿Sa加埋都只係得$29.8，於是就懇求節目組俾阿嬌重抽一次，最後佢亦幸運抽到2000元，兌換成當地貨幣後三人共有$463.8新幣。
被選中做財務戀監嘅阿Sa指自己數口非常差

獲得旅遊基金後，三人就跟指示出發，先後嘗試氣球飛鏢畫、食榴槤、老巴剎熟食市場、坐Sidecar同遊輪。
之後隨即出發遊覽同嘆唔同美食

去到食榴槤一站，三人先學開榴槤嘅方法，雖然雞手鴨腳但最後都成功劈開。經過一番努力後，三人終於舒服嘆榴槤放題，檔主端上唔同品種嘅果王，好似貓山王、黑珍珠、金鳳、S17、紅蝦等，而一聽到其中一款名為「金鳳」，祖兒就問道：「金鳳係邊個金鳳呀？我媽咪都叫金鳳喎，我要食金鳳！」阿Sa亦笑稱：「你食你媽咪呀。」
祖兒一聽到「金鳳」兩字就特別有親切感

不過原來阿Sa唔食榴槤，佢話：「以前細個有啲嘢我係唔食，但大個後又覺得冇嘢。唔知而家接唔接受到榴鏈，但可以試吓。」喺祖兒「鼓勵」下，佢就直接挑戰貓山王。不過一啖咬完就面容扭曲兼作嘔，仲即時吐出，又苦笑：「真係唔得，嗰個味道真係超難食，原來我都係唔得。」

阿Sa勇敢挑戰一向唔食嘅榴槤，不過就唔成功
祖兒見狀竟再叫阿Sa試食「金鳳」，面有難色嘅阿Sa反問：「再挑戰呀？」但最後都豁出去咬一小啖後，即表現生無可戀表情，仲要立即飲茶解味，令祖兒同阿嬌瘋狂大笑。

兩度嘗試之下仍然接受唔到果王風味