朱敏翰盼張振朗成三料視帝 預告年底再與蔡思貝合作

蔡思貝Sisley 同 朱敏翰 日前去到馬來西亞出席獨家粉絲見面會，同一眾劇迷提早過年，兩場fans meeting都係萬人空巷，可見TVB藝人喺當地幾受歡迎。
蔡思貝、朱敏翰同三位 《中年好聲音3》嘅大馬選手 王鄭浚仁、劉傳民 同 劉家溢出席fans見面會。
去年朱仔同Sisley就喺劇集《飛常日誌》中合作，朱仔就爆呢套劇有好大機會喺今年年尾開拍第二輯，之後仲同在場fans預告自己有份演出嘅新劇《痞子無間道》，將會喺2月同觀眾見面。
朱敏翰同蔡思貝 與fans一齊玩遊戲。
為咗氹fans，Sisley同朱仔都專登練定唱喺台上獻唱，佢兩個做訪問時就話自己為咗呢次獻唱，前一晚特登用啞鈴練飛膊（側平舉）同跑步練氣，所以上台唱歌時大家都可以揸實支咪同夠氣唱歌。
朱敏翰 與 蔡思貝 將於年底再合作拍新劇。
Sisley有份主持嘅節目《與天地對話》入圍今年「馬來西亞最喜愛TVB綜藝及資訊節目」，所以佢都有把握機會好好拉票，而朱仔就幫好友張振朗拉票，仲指希望對方可以成為三料視帝呀。

而喺檳城站，三位《中年好聲音3》嘅大馬選手 王鄭浚仁、劉傳民 同 劉家溢都有到場獻唱，雖然劉家溢喺比賽中被淘汰，但係佢都大受當地市民歡迎，而自稱喺主場唱歌嘅王鄭浚仁，就指檳城嘅市民相當熱情。