71歲肥媽風騷做美容代言人 飛大馬登台未能出席台慶頒獎禮

肥媽Maria Cordero 獲邀擔任美容代言人，簽約儀式上，肥媽好開心話扮靚唔係後生女嘅專利，好似佢年過70都可以做美容代言人，又可以搵外快，直頭可以過個肥年啦！

肥媽獲邀為美容中心擔任代言人
肥媽日前去咗欣賞古淖文演唱會，佢大讚German無論唱功、服裝，各方面都有高水準演出。而講到《中年好聲音2》有份競逐《萬千星輝頒獎典禮》嘅最佳綜藝節目獎，但肥媽就因為21號於馬來西亞開騷，19號已經提前出發到當地做準備，所以未能出席頒獎禮，覺得好可惜，不過佢已經交代另外兩位評判張佳添同周國豐，如果節目得獎，記得幫佢講埋得獎感言。
不過因為要往大馬開騷，將缺席台慶頒獎禮

肥媽嚟緊雖然要忙住四圍飛開show，不過佢就指自己一定係節目行先，無論幾忙，都會將時間優先留俾中聲：「過去兩年我其實都推咗好多騷，為咗《中年好聲音》，因為對呢個節目太用心，錢成日都可以賺，但大家咁齊心去做一樣嘢係好難得㗎！」

又大讚早前開騷嘅古淖文演出水準高