雲浩影新年即出新碟 為拍攝慘遭珠片拮入肉

雲浩影 近日推出第三張個人專輯「TOUCH OF ABSENCE」，以自我成長為題。以過去兩張專輯「The Cloud」、以及「INTRODUCTION to PAIN」互相呼應，講述傷痛過後、沉澱自我再重新出發嘅過程。

近日推出新碟嘅雲浩影早前拍攝專輯相片
早前為新碟拍攝相片，Cloud同團隊更天未光凌晨4點就出發，成功捕捉美麗柔和嘅晨光。今次佢嘅造型亦較過往性感，坦言起初感到擔心嘅佢，事後又表示非常期待成品。Cloud表示今次拍攝風格亦同過往唔同：「過往好多Close up、會有好多唔同嘅衫，今次係更加著重情感、Pose上嘅表達。」
與過往相比較性感嘅形象，事前令佢有少少擔心

Cloud以幾個唔同造型拍攝，搶眼嘅紅色上衣配透視珠片裙，同埋高貴嘅白色貼身長裙，兩套衫都若隱若現，佢話：「今次嘅衫係比較性感，自己都有少少擔心，有做Gym、打網球同食少啲碳水化合物準備。呢啲衫都係平時比較少着嘅類型，為咗迎合主題就嘗試咗好多唔同顏色，表現到唔同嘅面貌同狀態。」
佢又特別為拍攝準備，衣著亦係佢過往較少嘗試嘅類型

其中一個場景，Cloud要瞓喺玻璃餐枱下，工作人員由高處倒水到枱上捕捉畫面。Cloud要喺狹窄空間擺出唔同甫士，一啲都唔容易。之後，換穿珠片裙嘅佢又要踎又要瞓：「辛苦係要用手踭撐住石屎地，成個身體嘅力集中喺度，着住珠片裙全部都拮入肉，雖然辛苦但值得，好期待想睇到成品。」
Cloud話希望今年可以推出個人大碟同開演唱會

Cloud感恩表示入行第3年就推出第3張個人專輯，透露新碟內有一首自己非常喜歡嘅英文Cover歌。而新年願望就直言係舉行個人演唱會：「2025年更加期待會有大碟，更更更加期待會唔會有自己嘅個人演唱會。入行都一段時間，好想將自己儲落嘅歌，排一個演唱會嘅Rundown送畀大家，呢個都係我嘅願望。」