金牌媒人Bob再發功撮合胡定欣姻緣 分享視后與醫生男友初見面食飯經過

林盛斌（Bob）一向有金牌媒人美譽，即將主持女神配對計劃，呢日佢現身電視城為TVB全新戀愛綜藝真人騷《女神配對計劃》記招，並宣佈為「東張女神」梁敏巧、「扮嘢女神」關嘉敏、「愛回家女神1號」葉蒨文、「愛回家女神2號」李芷晴及「童顏女神」羅毓儀作全球招親，歡迎18歲以上、有意追求女神嘅單身男士，喺3月23號前報名參加。

新節目《女神配對計劃》為幾位靚女公開招親
五位女神喺記招上亦分享自己喺「圈中理想對象」畀大家參考，即場進行單身宣誓儀式，金牌媒人阿Bob喺後台有同幾位女神傾偈，了解女神喜歡嘅男士類型，阿Bob笑言自己有呢啲貨，已向身邊單身男士朋友透露有呢個節目，雖然阿Bob廣發英雄帖，不過佢啲朋友驚要上鏡拍嘢，暫時要再說服吓啲朋友，幫啲朋友壯吓膽！
被譽為金牌媒人嘅阿Bob，早已了解幾位美女要求，仲已向身邊男士埋手喇

胡定欣日前喺網上放閃公開戀情，有傳洪永城係媒人，原來真正媒人又係阿Bob。呢日阿Bob有分享點樣撮合定欣同醫生男友，更分享定欣與男友初次見面喺日本餐廳食飯嘅經過，阿Bob主動畀佢哋坐埋傾吓偈，等佢哋獨處同交換電話，幸好二人情投意合，之後慢慢發展。
定欣同男友一樣係由阿Bob介紹而認識

此外，五位女神暫時未知節目遊戲點樣安排，羅毓儀自認個性慢熱，拍真人騷時心情會有啲緊張，感覺不知所措，而關嘉敏話好耐冇拍拖，怕性格男仔頭，反而將啲參賽者當作兄弟。

幾位女士呢日亦公開心中理想型嘅要求