張馳豪新造型評語好壞參半 盼下個MV挑戰科幻題材

張馳豪Aska呢日現身電視城為新歌《Catch A Feeling》拍攝MV，喺未正式拍攝前，佢就好認真同一眾舞蹈員練舞同走位，務求拍攝出最佳效果。

Aska嘅新MV同一眾舞者勁舞
講到點解會揀喺教堂拍攝今次個MV，Aska就話同個故仔有啲關連，而為咗今次個MV佢哋都走咗好幾個景，而教堂景就係最後一站，不過由於佢哋由凌晨四點幾就已經開始工作，所以Aska做訪問晚都話自己已經係盡最大能力去睜開眼。
有唔同造型之餘亦於唔同場景拍攝

再次挑戰快歌，Aska話今次新歌嘅節拍感會更強，相信大家聽到都會忍唔住起身一齊跳，佢又指喺MV入面自己飾演一個有特別能力嘅獵人，最好嘅地方係佢呢個造型可以唔使剃鬚同遮鬚根呀。對於今次呢個新造型，Aska指朋友嘅反應好兩極，一邊就話佢留鬚好Man好有型，另一半就話佢留鬚好核突叫佢剃咗佢，所以佢都好想知歌迷接唔接受佢呢個look呀。
有鬚嘅型定係冇鬚有型？Aska希望大家比意見

Aska指今次拍MV好開心，因為可以嘗試演唔同角色，佢又話嚟緊最想可以喺MV挑戰啲科幻嘅題材。