中年好聲音3丨六大魔王輪流solo獻唱 fans為見偶像一早到場霸位

19位《中年好聲音3》嘅20強選手呢日齊集商場，同fans一齊欣賞主題曲MV播出，同場仲有中聲家族嘅 支嚳儀Venus 同 劉威煌 助陣，令到中聲家族嘅fans逼爆商場，就連場地贊助代表都親身嚟到現場支持一眾熱血追夢嘅選手。

《中聲3》20強參加者呢日出席商場活動，同大家一齊欣賞主題曲MV
佢哋除咗現場唱跳主題曲外，6位獲得高分舞台嘅選手都有Solo機會，當中包括創《中聲3》最高紀錄嘅黃博、張與辰、王鄭浚仁、李金凱、劉洋 及 陳芷盈。張與辰solo時氣場全開，佢自己都笑言感覺好似開緊演唱會咁，而黃博亦指呢次活動就好似一個大party咁。王鄭浚仁則指相當感謝fans們，因為佢聽聞有啲fans喺朝早7點就已經到咗現場霸位，而李金凱就話見到咁多fans支持覺得好感動。
熱鬧墟冚情況連場地贊助代表都非常驚嘆

作為師姐嘅Venus，就話喺台下睇住呢20強嘅演出，就好似睇緊街頭爭霸戰咁，每一個都唔知幾時會出絕招，個個都好犀利，而威煌就話覺得佢哋已經好ready。
身為「前輩」嘅威煌同Venus都大讚佢哋表現一流

對於劉洋同占士丁丁嚟講，最難到佢哋嘅應該就係唱廣東歌，劉洋笑言自己要同李金凱好好學習，而占士丁丁則指要喺咁短時間內學唱廣東歌係一大挑戰，不過自己會全力以赴，佢仲即場唱《愛是永恆》嚟展示自己嘅努力成果。

劉洋頗受現場朋友歡迎