《痞子無間道》街頭玩遊戲派福利 周嘉洛中學捉迷藏玩到call白車

medium
《痞子無間道》街頭玩遊戲派福利 周嘉洛中學捉迷藏玩到call白車

周嘉洛 朱敏瀚 陳瀅 JW 王灝兒 呢日著上戲服到街頭為劇集《痞子無間道》宣傳,四位隨機搵人玩急口令同問答遊戲大派福袋,面對街坊嘅自拍要求亦來者不拒,玩得非常開心!

《痞子》嘅幾位主角呢日現身街頭同觀眾玩遊戲
玩街訪前,佢哋其實仲去咗茶樓同學校,同老友記以及一眾學生玩遊戲,仲有Miss對朱仔講咗一句,令大家呆一呆嘅說話。事緣有位Miss同朱仔講,小學已經睇朱仔做戲,不過千祈唔好誤會朱仔年紀大,係嗰位Miss太後生啫!朱仔有Miss粉絲,嘉洛就好自豪自己深得老人家歡心,好多老友記話好鍾意睇佢做戲呀!
呢日朱仔遇到Miss粉絲,而嘉洛仲收到唔少老友記打氣

四位同一班學生打成一片,又玩咗唔少童年遊戲。嘉洛更自揭傷疤,分享中一時玩捉迷藏玩到見血嘅往事,當時因為太投入玩到唔小心撞柱,仲撞爆眼鏡當場流血,搞到要call白車入醫院,最後縫咗成七針先恢復靚仔樣咋。

嘉洛呢日仲大爆年幼時曾玩得太投入搞到入院

 相關推薦

熱門搜尋