歐陽萬成PO出與黃子華合照 網民留言盼兩代笑匠合作

憑棟篤笑而喺全球爆紅嘅美籍港人 歐陽萬成 Jimmy O Yang，曾經喺訪問中講過自己係睇黃子華嘅棟篤笑同周星馳嘅電影而成長，仲話希望可以抽時間返香港睇偶像黃子華套電影《破．地獄》。
Jimmy貼出同黃子華嘅飯聚照。當日飯局仲有C君。
Jimmy言出必行，日前就喺社交平台PO片透露自己唔只已經返咗嚟香港，仲睇埋子華套《破．地獄》。而9號Jimmy更PO出佢同偶像黃子華、C君一齊食飯嘅相，網民們睇到後都相當興奮，紛紛留言問佢哋係咪傾緊合作！
Jimmy拎埋珍藏嘅DVD畀偶像簽名。
可以近距離同偶像見面，Jimmy當然要好好把握機會，佢除咗同子華合照外，仲拎埋珍藏多時嘅《男親女愛》DVD畀對方簽名，Jimmy喺帖文中表示：「So happy to meet the brilliant 黃子華He was the first and still the best comedian in Hong Kong. Absolutely my inspiration.」除咗讚子華才華洋溢外，Jimmy仲指對方係香港第一個、亦係最好嘅喜劇演員，同時亦係佢嘅靈感來源。之後Jimmy又指自己係睇《男親女愛》長大，同時又讚子華喺電影《破．地獄》嘅演出極好，而最開心嘅係可以同對方一齊食潮州菜呀。
Jimmy話好開心可以同子華一齊食潮州菜呀。
對於Jimmy今次回港之行，除咗網民們覺得興奮外，高海寧、吳業坤、方力申、呂甜、張紋嘉等圈中人均留言以示歡迎，蔡卓妍更喺Jimmy同子華嘅合照下留言：「🤩🤩🤩🤩I love u both!!」
呢次返嚟香港，Jimmy仲去咗睇《破．地獄》。
香港出生，13歲就隨家人移民到美國嘅Jimmy，於加州大學聖地牙哥分校畢業後，對表演充滿熱情嘅佢就開始於美國各地嘅小型俱樂部開始棟篤笑事業，同時亦演出不同電影及電視劇。Jimmy擅長將文化差異加入其棟篤笑，當中涉及嘅華人家庭元素、移民經歷及其成長故事，都令外國觀眾聽得津津有味。
Jimmy憑棟篤笑而喺全球爆紅。