曾沛慈回應停止合作言論 親解冇follow汪東城原因

近年專注戲劇工作嘅台灣歌手曾沛慈，喺上年年底陸續推出新單曲，更同舊拍擋汪東城出合唱歌，令佢哋昔日嘅CP粉相當開心，不過亦有沛慈嘅fans指大東食老本，炒舊CP人氣，搞到兩邊發生罵戰，大東仲出post話要停止合作，令大家擔心佢同沛慈會友誼破裂。

曾沛慈推出新歌都搞到一頭煙
身為事件女主角嘅沛慈，呢日出席代言活動時就開腔回應事件，佢指自己同大東對於呢次再有機會合作，兩個人都覺得好開心，沛慈指大東喺經營社交平台上非常有想法，而佢覺得呢次係很好嘅合作，佢哋仲勉勵彼此以後要再有合作嘅機會，而呢件事後佢同大東都仲係朋友。至於粉絲之間嘅罵戰，沛慈就話因為fans太愛偶像，所以會喺諗法上覺得應該要點點點，不過佢覺得無關係，因為佢將會有新作品，相信fans們唔會失望。
曾沛慈同汪東城早年以CP姿態合作

至於講到冇follow大東嘅社交平台一事，沛慈就解釋以為自己一直都有follow對方，結果當日佢先發現自己冇撳過「追蹤」嗰個掣，沛慈指因為社交平台太多，而自己一直理所當然咁以為有follow，所以發現後就即刻DM返大東話要向對方下跪。
呢日講起新作煞停都難免無奈

沛慈同圈外老公結婚3年，提到生小朋友問題，佢就話同老公都係隨緣，又指二人世界都好好，雖然長輩們每年都會問，沛慈都會以「會好好加油」嚟回答，又會反問曾媽媽如果佢真係有小朋友嘅話係咪會幫佢湊，曾媽媽一聽到就會即刻收聲。
結婚3年嘅佢又話，對生小朋友一事隨緣

過年前沛慈發現子宮有瘜肉，呢日佢就同大家報平安，指做完手術後已回復健康，仲多謝老公同家人喺呢段時間無微不至嘅照顧呀。