陳豪新劇扮俠醫勤練射箭 同張曦雯合作多次終修成正果

陳豪、張曦雯、劉佩玥Moon、馬貫東以及一眾演員出席新劇《俠醫》嘅造型記者會，劇集嘅內容改編自真人真事，陳豪嘅角色正正以黃天賜教授為藍本，阿Mo都即場向黃教授賜教，而黃教授亦為劇集正式開拍主持開弓射箭儀式，非常符合俠醫嘅氣勢。
陳豪嘅角色以黃天賜教授為藍本。
阿Mo以往演過唔少西醫角色，而今次飾演一名行俠仗儀嘅中醫師，佢話首先要多謝黃教授勞心勞力，親自教導成team人好多細節。阿Mo指今次嘅角色雖然係中醫，但都有唔少動作戲份，唔止要耍太極，仲要練射箭。而黃教授就大讚阿Mo天資聰穎，表現得好專業。
陳豪終於可以同Kelly修成正果。
今次阿Mo再同老拍檔張曦雯合作，原來今次係二人首度正式飾演一對，事關佢哋雖然合作多次，但都只係彼此嘅前度，今次終於可以修成正果。
馬貫東喺劇中做阿Moon嘅兵。
馬貫東喺劇中傾慕阿Moon，係一名任怒任怨嘅兵仔，而阿Moon就拆解點可以令馬貫東對自己一往情深，原來靠8個字「女人不壞男人不愛」，馬貫東抵死回應阿Moon話因咩都好，但就一定唔關美貌事。
譚凱琪今次要挑戰自閉症角色。
丁子朗今次喺劇中嘅角色充滿挑戰性，因為形象陽光嘅佢要飾演一個壞事做盡嘅富二代；而一向演慣女強人嘅譚凱琪，就要挑戰自閉症嘅角色，佢話收到劇本時都好驚喜，開拍前特登接觸自閉症患者做足功課。
丁子朗今次挑戰反派角色。