中年好聲音3｜李金凱動人歌聲再唱喊評審團 黃博被批人歌未合一仍獲高分

最新一集《中年好聲音3》16強晉身14強一對一PK賽上半場，一集已有4位參賽者奪得9字頭高分，分別係「上弦」97分嘅陳芷盈《心有獨鍾》、96分嘅李金凱《當愛已成往事》、93分嘅黃博《華麗緣》，而唯一「下弦」就係以跳唱《獨一無二／獨家試唱》獲得90分嘅劉曉昆。可惜劉曉昆PK嘅對手係李金凱，最終獲90分仍要暫跌入「中年危機區」。

李金凱再以優異表現獲得極高分成績
myTV SUPER重溫《中年好聲音3》

有「中3天使」之稱嘅生命鬥士李金凱，本輪獻唱《當愛已成往事》再次搞喊評審們嘅「水煲」。金凱嘅動人聲線令海兒同肥媽感動落淚，東東亦坦言深受感動，就連自認冷血嘅周國豐都一度聽到要「咬唇」，佢話：「好喜歡一開始由嘆氣到唱第一句，連我呢啲咁冷血嘅人，我要忍住、我要咬唇！因為呢首歌本身係每一句歌詞都針拮咁樣，針拮得嚟最後又領略到人生個感悟，你唱得好好。」
海兒、肥媽都雙繼感受到動落淚

緊接獲得第3高分嘅，係獻唱葉蒨文歌曲《華麗緣》奪得93分嘅黃博，雖然佢一如往常輕鬆揮低「下弦」對手陸成東。但封佢為「女大魔王」嘅周國豐，反而坦言並唔鍾意黃博呢次演出：「呢首歌唔係好啱你唱，好少會見到黃博唱歌有少少辛苦。」而張佳添就認為黃博揀錯歌，未去到「人歌合一」境界，但技術上係「冇得頂」。至於東東評語則表示鍾意黃博唱歌嘅從容，但chorus部分就認為有少少惡。
黃博亦同樣得到高分，不過周國豐就對佢有少少批評

而再度同陳芷盈PK嘅「下弦」曹越，本回合獻唱《想你的365天》獲得86分，期間仲甩轆忘未拎起咪，海兒直指曹越肢體語言太多：「你唱歌好有power，但body language就會有啲too much power。」佢又自揭曾經有同樣經歷：「我自己試過呢個狀況，經驗係好care嗰刻個樣、body movement做緊咩，如果純粹係（動作）設計，好易distract到。」

《中年好聲音3》星期日晚 20:00 翡翠台