《聲夢2》總監聯手幫冠軍造歌 趙小婷認「Pizza聲線論」影響情緒

《聲夢傳奇2》比賽進入倒數階段，10月2號現場直播決賽，見證最後五強一決高下，呢日舉行五強終極戰記招，紅、藍兩隊總監Eric Kwok(郭偉亮)同陳奐仁率領眾人現身，並宣佈好消息，Eric Kwok同陳奐仁將合作，為冠軍度身訂造一首出道嘅歌，陳奐仁指當初參加節目係因為有機會同Eric Kwok合作先答應，期待咗呢個合作好耐，Eric Kwok笑稱對方咁早就知安排，陳奐仁反問佢點被「引誘」，Eric Kwok搞笑地講：「話有個陳奐仁可以畀你係咁鬧，咁你嚟唔嚟，我話正呀，好呀！」

而女子組合XiX非常期待演出，成員劉芷君仲話要電暈一眾觀眾，身邊繆昀希就笑言而家儲緊電力，等決賽先釋放；由頭帶到落尾嘅Sabrina趙紫諾，比賽片段點擊逾300萬，成為「學員之冠」，Sabrina感謝大家喜歡佢嘅表演：「每一個表演做嘅嘢係值得，同埋花咗嘅時間係值得。」

講到一路表演穩定嘅Jasmine任暟晴被批評十強賽表現欠奉、冇咩突破，Jasmine任暟晴坦言有睇晒網民意見，每日有留意最新留言，佢解釋：「見大家講我冇符合今年主題『我超越我』，我今次超越唔係喺唱歌方面，反而係我表演嘅心態，大家有留意我係好唔focus，得到Gin Lee老師同Eric Sir，同導師們嘅教導之後，係我所有表演之中最集中嘅一次，今次係直播要更集中。」

Janees黃洛妍早前翻唱泳兒歌曲，獲得譚詠麟公開稱讚，之不過Pamela趙小婷之前用「薄皮pizza」比喻聲線被受批評，Pamela直言影響比賽心情：「完全唔知呢個迴避點樣出嚟，因為我寫嗰個嘢係零用意，純粹係用比喻法，用『pizza』講出自己把聲唔夠厚，完全係講緊自己，估唔到大家聯想力，覺得我講其他人，100%係冇。我係愕然多啲，因為我要花時間去理解，人哋理解講緊咩，我又睇番自己係唔係寫啲咩，令人誤會。」Janees亦鼓勵Pamela有唔開心可以隨時傾吓。

此外，比賽除咗頒冠、亞、季軍之外，仲有兩個優秀表演獎，以及超越進步獎，一共有七個獎項，由兩位總監同導師們選出十強內，最有進步嘅學員，Zayden彭家賢同Angel劉詠彤都係大熱人選。