林德信Robynn新歌戶外發佈 80代年打扮Live演出新作

相識多年嘅Robynn同林德信終於合作推出歌曲《Sparkling Wine》，呢日佢哋就揀咗一個非常有悠閒感覺嘅地方舉行新歌發佈會喇。Alex同Robynn為咗配合曲風，仲齊齊以80年代打扮出現，佢哋仲親自解釋點解到今日先合作出歌呀。

同年出道嘅佢哋一直都係好朋友，直到近年佢哋各自以獨立歌手身份發展，先終於搵到機會合唱，仲話加入好多佢哋喜歡嘅80年代嘅元素喺當中呀。呢日Alex嘅媽咪同女友都有現身捧場，所以Alex都話特別開心呀，不過一問到佢幾時打算結婚，Robynn就即刻搶住道歉喎。

拍檔有親友到場支持，不過Robynn嘅老公因為外地確診，所以要養病而冇辦法親身到場支持喇。