On仔MV迷戀女角甘變替代品 廿秒劇情摑完又錫一時一樣

陳健安近日推出新歌《厭惡物圖鑑》，MV中On仔單戀女主角林千渟，除咗獻上螢幕初吻，仲被對方無情折磨，短短20秒劇情，要被大巴掌摑後又火辣激吻，忘我之時又突然被一手推開，心情七上八落。

喺MV中，On仔迷戀深愛前度嘅林千渟，同樣被愛蒙蔽嘅On仔默默忍受，甚至寫低對方討厭嘅事物製成「厭惡物圖鑑」，強迫自己改變討好對方。最後千渟蒙住雙眼，安仔就成愛的替身。

事後接受訪問時話：「今次MV故事好沉重，我哋都係鍾意咗一個唔鍾意自己嘅人，為對方做出好極端嘅事，無論鏡頭前後，我哋嘅情緒都好波動。」MV中千渟怒摑On仔絕無手軟，一日之內安仔就被掌摑十幾巴，連面都腫埋。

安仔透露拍MV前，佢哋專程去跟資深舞台劇演員邵美君老師學戲，千渟話：「導演同老師想我哋上堂，幫助我哋培養默契，最初拍掌摑鏡頭，我有錫住安仔，因為上堂有學過就力同角度，不過安仔好專業，叫我出力真打，結果真係大大力打落去，佢竟然話好興奮！」

而安仔就話：「真係好多謝邵美君老師，上堂期間我哋互相建立信任，除咗掌摑，仲有錫錫戲，而且係我嘅螢幕初吻，我好緊張，好彩上過堂好快進入狀態，多謝千渟畀咗好大能量我，因為佢認真咁用力摑我，令我有真正感覺更加入戲。20秒嘅劇情內，掌摑、激吻、怒吼，心情好似坐過山車，未試過，演戲真係好難！」

安仔除了新歌派台之外，佢有份演出嘅舞台劇《解憂雜貨店》喺15號開鑼，而佢下月初又會同樂隊Hertz舉行兩場「我是現場006音樂會」；聖誕節期間又會同C AllStar隊友喺西九文化區苗圃公園舉行「Let It Snow」演唱會。