周杰倫演唱會加場3.21公開發售 大會稱「假飛」炒賣嚴重有苦主被呃３萬

《周杰倫嘉年華世界巡迴演唱會2023香港站》將於5月5號喺中環海濱活動空間舉行一連7場演唱會，主辦單位宣佈加場(5月10號)於3月15號將於citibank進行優先訂票，3月21號則於cityline.com公開發售，而其餘6場，因疫情已過，放寬回100%座位，有極少量門票同步一齊發放，讓3年前曾退票及現時希望購票嘅歌迷，可以有機會搶購。

歌迷等咗周杰倫三年幾，對於佢落實嚟香港開騷，歌迷非常雀躍，由於長期持有門票嘅觀眾數量眾多，並且有部份來自海外朋友，主辦單位為歌迷再度延長舊票登記換票手續至3月14號，希望持有舊票嘅歌迷，進行登記換領新票手續，如逾期仍未登記嘅持票者只能申請退款，已登記換領新票嘅朋友，將於3月20日起陸續收到確認電郵，4月11日將陸續收到座位資料及門票領取細節。

大會最近發現網上假飛及炒賣嘅問題非常嚴重，呼籲歌迷千萬唔好循不法途徑購買門票，因為大會已收到多位苦主電話，有人於不名來歷網站購票，被騙兩、三萬元，亦有人不知從何途徑把大會發出登記成功嘅換領電郵，向想買飛嘅歌迷兜售炒價飛，每張比原價貴兩、三倍，大會發言人表示，登記換領電郵唔等於門票，敬請歌迷千萬唔好誤信不明來歷嘅票務。

據知周杰倫演唱會出現大量黃牛票反收購，於一啲二手網站，不難發現「收票」post ，用一倍或以上價錢，向長期持有嘅歌迷收購門票，不少歌迷網上討論「周杰倫真心勁，演唱會票竟然等同股票，張飛持有三年，升值一倍以上」、「等左三年呀，再升兩倍都唔賣」、「升兩倍我即放」，始終網上買賣存在風險，絕對要小心提防受騙！