聲生不息寶島季｜新一季開鑼今晚播出 那英張信哲領軍鬥唱功

去年無綫電視獲邀協製《聲生不息》，召集咗一班香港同內地唔同年代歌手，重新演繹港樂經典，節目播出後叫好叫座。今年芒果TV乘勢推出《聲生不息寶島季》，歌手陣容同樣鼎盛，，除咗分別出道35年嘅那英同張信哲擔任兩隊隊長外，兩隊隊員陣容一樣強大，好似有 張杰 華晨宇 馬嘉祺 張韶涵 魏如萱 楊宗緯，而節目主持則繼續由 何炅 冧莊。

《聲生不息 寶島季》香港版今晚起播出，除咗一班實力歌手嘅比拼之外，曾志偉亦驚喜現身錄影現場，佢仲鬼馬咁向現場觀眾大派飛吻。新一輯節目除咗定期喺內地大型舞台錄影之外，又設有分站直播，兩地歌手會透過大屏幕即時互動，首集分站設於台中著名景點日月潭。

而固定舞台設計特別，為配合演唱會模式，大會仲設計一個360度被現場觀眾包圍嘅舞台，令歌手同觀眾有更全面同近距離互動。那英演唱時，就笑稱尤如舉行演唱會一樣，出名感性嘅佢談及當年灌錄《白天》時嘅點滴仲一度哽咽 ：「好像演唱會喲，我覺得我的演唱會也不過如 此，我唱那首歌的時候才二十幾歲，很感人…」

除咗殿堂級嘅那英同張信哲一流唱功之外，另外兩位表現亮眼的歌手分別係魏如萱同張杰。「金曲歌后」魏如萱以天籟之音獻唱《你啊你啊》，唔止高音紮實雄厚，音域轉換亦揮灑自如，加上演唱表情豐富投入，令那英都聽到「毛管戙」。至於張杰 作為首位登上美國洛杉磯 Dolby Theatre(杜比劇院)舉行個人演唱會嘅內地藝人，唱起《想見你想見你想見你》時別具壓台感，配以身後播放劇集《想見你》嘅精彩畫面，成功掀動全場氣氛。

第一集歌單：
動力火車《娜魯灣情歌》
胡德夫、那英《橄欖樹》
馬嘉祺《你的樣子》
楊宗緯《鹿港小鎮》
那英《白天不懂夜的黑》
張信哲《我是真的愛你》
華晨宇《一定要幸福》
張韶涵《遺失的美好》
魏如萱《你啊你啊》
張杰《想見你想見你想見你》
大合唱《我的未來不是夢》

《聲生不息 寶島季》逢星期六晚 20:30 翡翠台