TVB生活資訊節目《Dolce Vita》今年邁向第18年,為咗再向觀眾呈現新鮮感,節目除咗中文名由《港生活‧港享受》改為《至尚生活》,更加入3位新血主持包括兩名J2er伍韻婷(Juliana)、吳兆麟(Alan)及星級主廚楊尚友(Christian)。上周六播出第二集先介紹被汽車發燒友譽為「車手天堂」嘅極速跑車、仲有介紹由古蹟改建而成嘅英倫餐廳,以及集合超過2,500個參展商嘅第40屆香港國際珠寶展,短短半粒鐘節目包攬潮流焦點、美食及服裝珠寶三大品味範疇。
今晚(8號)播出第三集內容同樣精彩,最吸睛就係兩名新加盟主持Juliana及楊尚友、齊齊走入全球排名第三嘅自家繁殖「忘不了」環保魚場,深入了解身價不菲、 被譽為馬來西亞國寶級美食嘅「忘不了」魚三大矜貴之處。
Juliana 及楊尚友更在魚場創辦人Gary安排下,享受由法國藍帶大廚Bonnie親自烹調嘅三道由「忘不了」魚做主打法國菜,分別為自由風魚湯、魚柳酥烤及焦糖馬卡龍。對於可以將魚化身甜品,連作為大廚嘅楊尚友亦嘖嘖稱奇,佢與Juliana對於Bonnie炮製炸魚鱗亦一試難忘, 想聽詳細食後感,密切留意今晚一集。
主攻Fashion範疇嘅黃碧蓮(Linna),上集親身示範配戴唔同款式靚珠寶,其中一套更由鑽石、紅寶石、地中海珊瑚石、黃金及白金打造而成,相當名貴。呢集Linna負責專訪四名來頭不少嘅亞洲時裝新勢力設計師,包括 Alex Po、Derek Cheng、Mei Chen及Ming Ma,Alex及Derek受訪時除咗大談「性別流動」嶄新設計概念,以及拆解點樣「將牛仔褲打破突有框框做出創意」。至於潮流焦點環節,今集將介紹干邑,到底干邑有多少種類,價錢差異又可有多大?
談到主持陣容就有三位新加盟主持,固有班底有黃碧蓮(Linna)、邵珮詩(Veronica)、 魏韵芝(Joyce)、廖倬竩(Ivy)、胡㻗(Fei)、黃耀英(Darren)及蘇頌輝(Desmond)。 早前10位主持以全新形象拍攝宣傳片,一眾女主持可謂各有各靚,有「高貴喱士」Ivy、 「耀眼閃綠」Veronica、「黑色閃石透視」Linna、「型格低胸」Joyce 及「Shocking Pink」 Juliana,五女之中以Juliana最為搶鏡,配戴超長閃石耳環,身穿桃紅色貼身長褸及出奇不意嘅bra top設計,盡顯高貴及美好身段,加上迷人笑容,期待值爆燈。不過「師姐」Linna裝扮亦暗藏玄機,正面睇冇咩特別,原來所穿戰衣係大露背設 計,白滑玉背同樣搶焦。 曾參選港姐嘅Juliana學歷其實相當不俗,於美國土生土長,就讀 University of Massachusetts At Amherst,大學時分別主修金融及中文,以相等於香港一級榮譽成績畢業;至於同為新加盟主持嘅Alan,特別之處係5歲已開始學小提琴及跆拳道,除咗拉得一手悅耳古典樂外,跆拳道方面更曾勇奪廣東省第一名,絕對係動靜皆宜代表。
生活資訊節目《Dolce Vita》(《至尚生活》) 周四晚 9 點明珠台播英語版
粵語版於周六晚 10 點半 J2(82 台)及深夜 12 點半無綫財經體育資訊台播映