吳大強當年幫兩子報名入無綫 遲婚40歲做爸爸見證兒子追夢成才

71歲「追夢爸爸」吳大強（Bill哥哥）接受香港電台第一台《舊日的足跡》訪問，分享自己嘅演藝夢，以及對幾名兒子事業各有所成嘅感受。Bill哥哥小時候家住元朗，佢經常健身擁有八塊腹肌，當年佢渴望成為職業球星或明星， 可惜事與願違，佢喺1971年參加香港電台舉辦歌唱比賽，憑歌曲《One Day》獲得第二名，翌年報名無綫電視藝員訓練班卻失落。

Bill哥哥指比賽第二輪已冇下文：「可能我唔夠帥氣亦唔夠高。婚後我睇住四個仔，心想佢哋會唔會有（加入演藝圈）天份、興趣及能耐？當年無綫招考藝人，我為老二及老三報名，結 果千多人之中只選九名入圍者，他倆被揀中。不過老二一直夢想做飛機師，要去加拿大升學，結果老三加入娛樂圈。」 而佢口中嘅老三就係《愛·回家之開心速遞》朱凌凌嘅吳偉豪！

Bill哥哥稱四個兒子名字最後一個字分別為『諾』、『言』、『豪』、『傑』，呢個係Bill哥哥對佢哋嘅期望，Bill哥哥續道：「我做過輔警， 太太任職懲教處。我們住宿舍，家中非常守紀律。當年老大考消防隊長，我曾經好擔心。佢畢業冇耐，牛頭角大火事件傳出有消防隊長出事，佢都喺現場。我打電話畀佢又無人接聽，幸好最終搵到佢。」

Bill哥哥回想當年老二要做飛機師，Bill哥哥起初認為呢個係不切實際嘅夢想，直到剛巧遇上國泰招募機師：「阿仔順利過咗好多關，終於喺澳洲畢業，仲代表同學致謝辭，我感到好驕傲。他做咗飛機師，讓我享有乘機優惠。現在係收成期，可惜又遇上疫情……」Bill哥哥笑指暫時仲未坐過由阿仔駕駛嘅飛機。

談到入行七年嘅三兒子吳偉豪，Bill哥哥稱阿仔入行嗰陣未夠18歲，見到阿仔跟同期同學相比，表現算令人滿意，有人稱讚吳偉豪為「翻版吳彥祖」，Bill 哥哥認為電視台比阿仔靚仔嘅演員大有人在：「他做戲仲可以。我曾擔心佢會學壞，但原來劇組就好似一家人咁互相照顧，令我好放心。」同時Bill哥哥替阿仔獲頒「飛躍進步男藝人獎」感到非常開心：「幸運地去年佢參演嘅劇集讓佢有發揮機會，自此之後佢更有信心。喺呢個圈一定要學習他人嘅演技，不一定要似發哥（周潤發）或華仔（劉德華）， 但要努力去做。」

被問到有機會父子檔拍劇，Bill哥哥坦言自己只懂唱歌，係一個素人， 不過有機會試一試都無妨。 Bill哥哥未婚前曾移民加拿大並修讀酒店管理，回港後從事酒店業，直至兩年前退休。大約於1994年，佢喺大球場旁邊酒店工作，經常因贊助球隊而出席足球活動。「當年見到偶像譚詠麟，佢嘅歌《情憑誰來定錯對》好紅。心想佢唱咁多好歌畀我哋欣賞，如果有一日我可以唱歌畀佢聽便今生無悔。終於喺今年《中年好聲音》節目中，譚詠麟擔任嘉賓評判，而我剛好獲分派演唱呢首歌，我真係可以唱歌畀佢聽！喺後台我跟佢提及此事。」Bill哥哥稱唱得不及原唱動聽，但知道自己唱得唔難聽，所以 Bill哥哥都好開心。

Bill哥哥稱自己遲婚，40歲先做爸爸，並指自己對幾個兒子揀女友好開通：「雖然我係潮州人， 但（兒子）不一定要娶潮州女孩。靚女當然好，但心地好更重要。」佢更喺節目中向太太表示愛意：「好想讓佢知道佢係我生命嘅一部份，特別係我早前身體不適，佢對我照顧有加。我要向佢講『I will always love you』，希望佢感受到我對佢無盡嘅愛。」Bill哥哥喺節目清唱《Yesterday once more》送畀太太， 非常溫馨！