你好，我的大夫丨吳偉豪爆陳嘉慧笑點低 游嘉欣對日語對白感頭大

以中醫為題材嘅新劇《你好，我的大夫》，故事除了圍繞程嘉應(蔡思貝飾)和辜清勁 (何廣沛飾)呢對青梅竹馬嘅矛盾外，還有四位新晉中醫師路遠志(吳偉豪 Ricco 飾)、袁絲絲(陳嘉慧 Erica 飾)、唐韶光(游嘉欣 飾)及彭晴望(孔德賢 Danny 飾)喺互相感染同鼓勵下，將會同程嘉應、辜清勁聯手打造心目中理想中醫診所「六君子館」嘅故事。
《你好，我的大夫》係圍繞一眾新晉中醫師嘅故事。
監製方駿釗向來鍾情起用年青演員，喺上一齣劇集《愛上我的衰神》令無綫新晉小花 Erica成功入屋，而今次嘅新晉醫師四君子、平均年齡只有約25歲，當中年紀最少嘅游游更只有23歲。四人喺劇中擔當好大嘅「緩和」作用，無論係程嘉應同辜清勁嘅針鋒相對同鬥氣場口、阿光錯漏百出的驚青場口，定係晴望纏住媽咪唔放嘅場口，很多時都係笑中有淚，四君子喺劇中感情相當要好，經常互相幫忙同扶持。
蔡思貝同何廣沛飾演一對。
Ricco指劇中嘅群戲係最難忘：「因為拍攝過程真係好開心同溫馨， 感覺好似一齊返學咁。可能由於我哋全部年紀相差唔大，大家好有默契、好玩得。」講到同Erica嘅鬥氣戲份，Ricco 笑言同對方開工永遠都係好好笑，因為對方永遠都會忍唔住笑。而孔德賢則笑言愈拍愈肥，原因更加係同監製大人有關：「拍時好開心，拍嘅期間我哋慶祝咗三次生日，監製又成日買炸雞 Pizza 落嚟請我哋食， 其實我哋係愈拍愈肥，愈拍愈開心，我哋 Off 咗 Cam 都係咁玩、係咁笑。」
Ricco爆Erica拍攝時成日忍唔住笑。
四君子喺劇中嘅造型亦別具心思，阿光嘅招牌孖辮Look係游游首度嘗試嘅造型，游游解釋自己嘅造型設計：「長期紮住孖辮主要係因為想個角色可愛啲、親切同溫柔啲，鄰家女孩咁。佢啲服裝都係偏日系，其中一套藍色有民初中醫大夫 Feel，料係藍色麻布嚟，聽講都幾貴。」日語零基礎嘅游游，指要應付大量專業日語對白，令佢相當頭大，佢話全靠Erica幫忙渡難關：「嗰場係話阿光去聽最崇拜嘅日本教授講座，因為阿光識日文，就用日文同教授交流。因為阿光問嘅問題好多專業名詞，我自己又冇學過日文，又要背、又要講、又要投入個角色就覺得好大壓 力。其實一知道要講日文，我已經周圍搵人幫我翻譯，跟住拍嗰日我就拎住張紙 不斷背。嗰場 Erica都有同場，佢教我同幫我改善讀音，但都真係相當緊張， 嘩!諗番起都好驚。」

《你好，我的大夫》9月11號起 逢星期一至五 20:30 翡翠台