蔡思貝小產真相揭盅！壓抑傷痛勁揪心 區明妙慘被灌藥兼拍裸照爆喊

TVB熱播劇《你好，我的大夫》噚晚（5 日）呢集有兩大高潮位，上回講到寶爸（李啟傑飾）擄走麥寶（區明妙飾）後，為咗換取毒品竟然將親生女兒交予不法之徒，肉隨砧板上嘅麥寶慘遭灌藥兼喺失去意識嘅情況下被拍裸照，麥寶幸保清白兼獲救，但因覺得一切因Ed師兄（孔德賢飾）拒愛而起、加上擔心裸照被公開，整個人變得空洞又失落。呢個鏡頭齋睇都覺得麥寶慘、寶爸衰。麥寶昨晚慘遭灌藥兼被拍裸照，十分慘情。妙妙呢幕喊戲勁有感染力，會說話嘅眼神再度成功搶焦。

麥寶對Ed師兄不瞅不睬，更回復任性狀態濫藥麻醉自己，Ed師兄見狀感到好內疚，糾纏一輪後終於向麥寶坦白內心真實感情，最終攬在一起，區明妙之前喺《愛上我的衰神》憑被殺死後嘅怨恨眼神贏盡焦點，呢次再憑空洞眼神懾人心魄，一串串淚水從失焦嘅雙眼落下，好有感染力！

實際都鍾意麥寶嘅Ed師兄，見到麥寶咁當然好心痛。麥寶濫藥麻醉自己！

區明妙煲韓劇常多留意其他演員演繹方法，對拍攝代入角色好有幫助：「印象中嗰陣仲開緊另一套劇，有時可能要拍完一邊又趕另一組，瞓得好少，所以有時個樣會特別攰，咁就啱啱好符合咗個角色設定。」妙妙感激「老竇」李啟傑教路順利拍被綁架及灌藥嗰場戲：「同李啟傑都唔係第一次演父女，所以有啲默契，佢有教我點樣就位。」談到劇中角色勇敢追愛，問到現實中有冇追男仔，妙妙笑言：「現實中我比較被動，要人哋追，哈哈！」

當年嘉應同清勁分手後發現有咗，嘉應仲即刻飛去泰國想同清勁講。嘉應意外跌倒造成流產。嘉應只能忍淚將有咗呢個秘密吞番落肚。昨晚清勁聽錄音呢幕，滿載住劇組同埋演員嘅心思。

呢集嘉應（蔡思貝飾）小產之謎亦於揭盅，原來嘉應當年喺清勁（何廣沛飾）飛赴泰國義診期間發現自己懷有對方骨肉，前往泰國尋找當年已分手嘅清勁；因清勁全程表現冷淡，嘉應未敢將真相講出口，並喺混亂間意外跌倒兼流產。噚晚清勁透過錄音得悉事件來龍去脈，洞悉嘉應對自己壓抑多年嘅感情，唔想與嘉應再行冤枉路，清勁力求重修舊好，不過呢回卻輪到受過太多傷害嘅嘉應斷然拒絕：「你覺得過去放低就放低咁容易？」二人關係再呈膠著狀態……

嘉應同清勁嘅感情線亦漸進高潮。

據劇組透露，噚晚嘉應錄音呢幕暗藏心思，為咗讓錄音場口更真實同有感染力， 思貝與導演商量過後，爽快地換上多個唔同造型錄音方便觀眾區分時間，刻意設計攬公仔、托腮、對住定情藥囊、瞓喺床上、瑟縮家中暗角等唔同肢體語言，突顯錄音嗰陣唔同嘅心理狀況；嘉應忍淚致電廣沛嗰幕亦極有感染力，表面上只係講瑣碎事，內心其實隱藏極大痛苦及秘密，思貝演活落力壓抑內心傷痛、但淚水卻又忍唔住嘅狀態，演得好細膩。

思貝演活落力壓抑內心傷痛、但淚水卻又忍唔住嘅狀態，演得好細膩。

下周結局周｜《你好，我的大夫》逢周一至五晚8點半翡翠台播映