無份角逐金像獎未感失望 林家棟戥鄭保瑞導演開心

影帝 林家棟 、高世章、著名美術指導何劍雄，日前應 陳善知 邀請出任一個創意短片比賽評判，參賽者以唔同形式解讀呈現著名粵劇《帝女花》，年青人嘅創意思維都令三位非常驚喜，何劍雄表示創意係重要嘅一環，點樣可以將一個舊劇目變成新嘅一樣? 就要靠年青人大膽嘅創意，家棟都話好欣賞參賽者分別用咗對白處理、音樂處理以及畫面處理，每一個作品都感受到佢哋嘅一團火。家棟話自己當年去新加坡登台都演出過《帝女花》，佢話真係一大考驗，亦感受到演粵劇絕對唔容易呀。

而日前《第42屆香港電影金像獎》公布提名名單，家棟有份參演嘅《命案》、《第八個嫌疑人》同《潛行》均入圍角逐不同獎項，唯獨佢未有個人提名，雖然今年食「白果」，但係家棟就未感失望，佢仲話以後仲有大把機會，反而好戥鄭保瑞入圍最佳導演開心，仲話《第八個嫌疑人》嘅大鵬有份角逐最佳男主角係實至名歸添。