新劇與林峯爭奪佘詩曼 黃浩然嫌見得對方太多想嘔

澳門國際短片節呢日舉行閉幕禮，林峯、黃浩然、日本名導岩井俊二、泰國女星Aokbab、朱鑑然、胡子彤、陳苡臻及林家熙等均有出席。林峯同黃浩然合作嘅劇集《家族榮耀之繼承者》日前釋出預告片，唔少觀眾都好期待睇兩位型男爭佘詩曼，對此林峯就叫大家期待一下，不過佢就話雖然劇中要爭風呷醋，但就唔會有大打出手嘅戲呀。

林峯話同浩然識咗廿幾年，但佢哋都係近年先至有多啲合作，黃浩然仲笑住咁話：「我哋平時食飯就多，合作都就係呢幾年裏面發生，呢幾年多到我直頭話出埠合作後，你（指林峯）返嚟香港後盡量唔好搵我。」浩然仲笑言同林峯見得太多，好厭想嘔喇。

兩位靚仔人父平時都會交流下育兒心得，浩然就話林峯個囡囡Luna好鍾意笑，仲分享有次喺林峯屋企做直播時， Luna聽到佢兩個笑時，就跟住一齊笑到咔咔聲，相當可愛呀。

胡子彤之前同洪金寶、古天樂、任賢齊等拍攝動作電影，唔只一日要打足十幾個鐘，佢仲畀對手打爆下巴搞到要縫咗十幾針，胡子彤話因為當時係喺疫情第五波最嚴重時拍攝，所以為咗唔好影響拍攝進度，佢縫完針第2日就即刻返片場繼續拍攝，子彤話好在劇組人員對佢好照顧，每拍完一個鏡頭都會即刻幫佢消毒呀。