Rain時隔8年香港再開巡迴騷 狂騷肌學廣東話講我愛你

韓流天王 Rain (鄭智薰) 相隔8年再次舉行個人巡迴演唱會，香港站星期六晚喺亞洲國際博覽館順利舉行。Rain為香港Fans帶來完美同充滿魅力嘅演出。

演唱會主題「STILL RAINING」代表Rain依然係K-Pop代表，相隔8年來港開騷，魅力依舊。Rain一出場就令全場Fans陷入瘋狂，佢亦隨即演出多首大熱作《Gang》、《It's Raining》同《躲避太陽的方法》等，又以英語高呼「香港」。

Rain一身強勁肌肉睇到台下觀眾嘩嘩聲

一輪勁歌熱舞後，Rain用廣東話打招呼話：「大家好，我係Rain」，又話已經好耐冇用香港Fans見面，見到咁多歌迷在場非常開心。佢話：「我由三藩巿飛嚟香港，一到埗就到場館綵排，仲苦惱點同大家互動，仲食咗好多點心。」

之後Rain打算著返上衣，但係台下Fans就高呼「唔好」，佢亦搞笑話：「反正一陣會再除」。Rain又多次走到台下同大家握手，中途仲大玩「Dance Cam」；大會攝影師透過攝影機「點名」台下Fans進行跳舞挑戰。

時隔多年再來港演唱嘅佢，呢晚獻唱多首經典歌曲

Rain呢晚又加插翻唱環節，分別獻唱PSY嘅《江南Style》、NewJeans嘅《Hype Boy》仲有Bruno Mars嘅《24K Magic》同《Leave The Door Open》。

呢晚Rain兩個半小時演出，狂唱經典歌曲，有《I Do》、《Love Song》、《30 Sexy》同《Rainism》等，到Encore環節，佢又話想同香港Fans玩通宵，可惜時間過得太快。佢仲話自己專登學廣東話，不過就認為太難，只學識「唔該曬」同「多謝」，最後再用廣東話冧Fans講「我愛你」，圓滿結束香港站演出。