孫燕姿46歲生日拍片自爆近況 病足一個月身體失控地顫抖

啱啱渡過咗46歲生日嘅孫燕姿，趁住生日拍片同fans分享自己近況，片中孫燕姿坦言自己最近「沒有很好」，因為早前參加完音樂節之後，佢就病咗成個月。
孫燕姿剛剛渡過46歲生日。
孫燕姿講返當日出席音樂節嘅情況，佢話自己唱到第二首歌時，就已經全身冒汗，由於佢話自己平時唔會點出汗，所以當下嘅狀況令佢有啲危險感。當演出完返到酒店後，孫燕姿話自己成個人都不由自主咁一直顫抖，完全控制唔到，令到身邊嘅工作人員都非常擔心。
燕姿特登拍片同大家分享近況。
雖然孫燕姿喺片中講返當時情況時一直帶笑，但佢話其實當時自己都好擔心，因為佢印象中自己從未試過發生過咁嘅情況，一直顫抖近兩個鐘，而第二日就開始發病，當時雙眼發紅、臉色好差，佢話自己呢段時間睇過中醫、西醫，又去過睇急症，食咗各種唔同嘅藥，經歷咗一段好漫長嘅時間後，而家終於康復喇。
燕姿透露自己過去一個月病倒。
由於病倒嘅關係，令孫燕姿被迫暫停演唱會嘅鍛鍊，佢坦言自己心情亦有因此而受影響：「心情有點在谷底，覺得好像之前的努力又歸零。但得想說，可能人生就是這樣吧，就是起起伏伏的，有時候很順利有時候很曲折，這是我最近比較曲折的一些近況。」
好在燕姿話自己而家已經好返喇。
片中孫燕姿又多謝歌迷對自己嘅支持，見到大家以捐款到慈善機構嚟作為佢嘅生日禮物，孫燕姿話令佢非常感動，同時見到有歌迷賣廣告，又會令佢心痛大家太破費：「我也知道可能歌迷是想要為了明年的演唱會幫我做一番宣傳，在這裡要很謝謝你們，但下次，記得這些都可以去做其他有意義得事情。」
燕姿晒出囡囡送嘅生日禮物，係佢親手 DIY嘅項鏈。
孫燕姿又分享自己出門前收到囡囡DIY嘅頸鏈作為生日禮物，笑言同佢件白T-shirt好襯。至於講到歌迷們最關心嘅演唱會，孫燕姿承諾大家明年一定會發生，仲話舞台同其他嘢都已經開始定落嚟。另外，孫燕姿又透露嚟緊將會出新歌，片中佢仲率先哼唱咗兩句畀大家聽呀！

佢仲話出年嘅演唱會係一定會發生呀！