鄭秀文紅館騷大美人李嘉欣捧場 點唱Dear Jane《到底發生過什麼事》

天后Sammi鄭秀文紅館演唱會進入倒數階段，噚晚舉行第11場，吸引唔少圈中人睇騷，包括李嘉欣同丈夫許晉亨、徐濠縈與囡囡陳康堤、梁漢文與太太Karen、炎明熹、王君馨、衛蘭、衛詩、鍾舒漫、鍾舒祺、鄧麗欣等，大美人李嘉欣興奮與1比1人形紙Sammi紙板合照。

大美人李嘉欣同丈夫許晉亨現身紅館

呢晚Sammi請樂隊Dear Jane任嘉賓， Sammi新歌《盲盒》由Dear Jane嘅結他手Howie作曲，Dear Jane為表演特別重編《煞科》，唱出Sammi點唱嘅《到底發生過什麼事》，令全場High爆！ 出場前Sammi大賣關子話：「呢隊嘉賓我一路都好想同佢哋合作，但一路都未有機會，好開心今次邀請佢哋就一口答應，去年，佢哋首歌唱到街知巷聞，我真係好想佢哋Live演唱一次畀大家聽。」

呢場由Dear Jane擔任嘉賓

Dear Jane升上舞台，全場尖叫，佢哋走勻四面台合唱《煞科》，主音Tim表演其中一段Rap將氣氛推至高峰。之後Sammi逐一同成員擁抱多謝Dear Jane應邀做嘉賓，仲話私心點唱其Hit爆金曲《到底發生過什麼事》，而巧合地呢隻歌嘅MV女主角Stephy亦有捧場。

Sammi嘅演出轉眼踏入倒數階段

完場後，Sammi立即衝出紅館門外，同數百歌迷見面同簽名，Sammi更主動走近Fans人群鞠躬、揮手同比心心有求必應，做咗超過十場騷嘅Sammi依然能量滿滿，狀態大好。
完場後Sammi再到後台外同歌迷見面