張家輝獲頒「卓越電影成就獎」 親赴馬來西亞宣傳兼領獎

兩屆金像影帝張家輝，應第7屆馬來西亞國際電影節（MIFFest）邀請，為其執導及主演新作《贖夢》成為電影節閉幕電影，家輝更獲大會頒發今屆「卓越電影成就獎」，表揚演而優則導嘅佢為電影界付出嘅傑出貢獻！
 張家輝奪得卓越成就獎.jpg
27號家輝以一身藍色西裝、眼鏡斯文look現身吉隆坡出席頒獎禮。而喺頒獎環節開始前，台上先播放一段剪輯家輝經典作品嘅短片，同影迷一齊回顧佢入行35年所以演繹過嘅眾多精彩角色。隨後家輝就上台接受榮譽，從頒獎嘉賓，大馬著名演員Mr Bront Pala手上接過獎項，家輝以英文謝辭，感謝大會對佢電影生涯嘅肯定，並多謝影迷一直以嚟嘅支持同愛戴。獲獎後，家輝受訪時就再講到得獎感受：「我覺得今次獎項係對我，又有一個更深層次嘅鼓勵，過往我攞過一啲演員嘅獎項，但今次頒發呢個卓越電影成就獎，包含住大會對我做導演範疇上面嘅鼓勵，證實到我愛電影。」
 張家輝為最佳女主角獎項頒獎。
家輝認為今次獲獎別具意義，皆因馬來西亞係佢導演之路嘅起點。十年前公映嘅《盂蘭神功》，除咗係家輝處男作外，成套戲都係同大馬電影人合作以及喺當地拍攝。不過原來比起呢套處男導演作，家輝更早同大馬結緣：「最早初期嚟大馬，就係喺亞視或者 TVB 藝人時期，嗰陣時仲係一個錄影帶年代，我哋成日都要過嚟為影帶公司度做宣傳，去 promote電視台嘅劇集，所以我好早年已經係會過嚟馬來西亞㗎嘞。」除此之外，家輝亦有擔任電影節頒獎嘉賓，頒發最佳女主角俾演員Aenne Schwarz。
 張家輝與一眾電影人：莊文強、黃進、曾國祥、袁富華、林明禎等合照。
電影廣受海外影展關注，唔只成為今屆MIFFest閉幕電影，作品亦先後獲邀參與多個國際影展，對於電影喺頒獎禮翌日正式同大馬觀眾見面，將會聯同有份主演嘅袁富華，一同現身閉幕放映嘅家輝，就表示相當期待觀眾反應：「《贖夢》呢一趟影展行程入面，即係包括我之前去咗嘅意大利、韓國富川、西班牙，跟住而家又嚟到馬來西亞國際電影節，而唯一呢個馬來西亞舉辦嘅電影節，係電影第一個放映嘅華人地區，華人地區睇返華人電影，嗰種感受應該會再深刻啲，我覺得係會再投入啲嘅，比起畀西方人去睇嘅時候。希望都如我所願，首映令到觀眾會滿意。」家輝又認為大馬係一個新舊城市交替嘅地方，充滿神秘色彩傳說同神話說，所以佢特別期待大馬觀眾對電影帶出嘅訊息有更深刻理解。
 張家輝與日本導演是知裕和合照。
呢次家輝亦行程緊密，抵埗當日就馬不停蹄接受大馬傳媒訪問，又為電影節進行打手印儀式，緊接出席當晚大會主辦嘅「香港之夜」。現身嘅演出仲有姜皓文、袁富華、導演莊文強、曾國祥、黃進、黃綺琳等，身在大馬嘅林明禎及今屆電影節終身成就獎得主，日本大導演是枝裕和都有出席，家輝喜遇一眾影圈新知舊雨，大家都把握機會交流。