郭富城紅館演唱會開騷在即 搭建半模擬舞台排練近700小時

踏足紅館第30年，闊別紅館舞台8年嘅郭富城，將於下個禮拜展開全新紅館個唱。為咗答謝歌迷一直支持，Aaron同團隊籌備咗近一年，以半億打造立體多元舞台，以超巨型LED屏幕幾近紅館天花板。城城同舞者排練咗三個多月近700小時地獄式排練，游走唔同舞室彩排，日前喺元朗片場搭建半模擬舞台作衝刺練習，務求為演出做足準備。
郭富城以半億打造立體多元舞台。連日嚟不停綵排。
郭富城演唱會每次都有令人驚嘆嘅舞台，今次選取三面台，令視覺特效更嶄新地配合城城嘅各個章節的歌舞，似魔幻球般變化，務求令在場不同座段嘅觀眾都可以觀賞到舞台變化。城城都大讚今次舞台非常立體且具藝術感又多功能，佢希望能可以同大家多啲方位互動。
張叔平為城城打造舞衣。
今次有幸邀請咗美術大師張叔平為城城打造舞衣，阿叔嘅設計集時尚、亮麗、品味、型格於一身，每一件都有標誌性嘅心思，似一件藝術品。城城表示：「連月來嘅排練係一件刻苦但快樂嘅事，大家為做好今次嘅演唱會而一致地全情投入！我都好期待着上阿叔打造嘅舞衣來表演，期待大家來分享我這個ICONIC之約，可以發現一個不一樣嘅郭富城！」
城城話好期待着上阿叔打造嘅舞衣嚟表演。