胡定欣搞生日會提早慶牛一 感恩與影迷相互扶持成長

9月9號係胡定欣生日，不過為免影響Fans準備開學，定欣每年都會提早喺8月中搞生日會同影迷慶祝。日前定欣先喺香港同近120名來自香港、澳門、國內及新加坡fans舉行首個生日聚會，之後會再飛到上海同當地影迷相聚。喺香港生日會嘅席間，定欣以歌曲及小遊戲、一對一合照感謝大家支持，定欣感動表示：「好開心我嘅說話可以鼓勵到大家，係大家走下去嘅動力，你哋已經做得好好，比我更叻！」
 定欣提早同fans慶祝生日。
定欣亦笑言，同影迷慶祝生日嘅次數真係十隻手指都唔夠數，有一啲更加由小朋友開始，一轉眼已經變成十年以上資深鐵粉，所以每年生日聚會，慢慢已經變成好似家人之間嘅聚會。今年聚會上，定欣更逐一細聽每位影迷分享對自己嘅感覺，定欣就話：「呢幾年收嘅心意卡，出現最多嘅字係DSE！喺你哋想放棄、沮喪時，多謝你哋諗起我嘅工作態度、我嘅每一句鼓勵說話同我哋經歷過嘅每個moment，我想講你哋已經做得好好。能夠成為你哋嘅精神支柱真係我嘅福氣，一直覺得係你哋俾我力量，聽到每一位分享時，好感動！我忍住眼淚，嗰份影響力原來遠遠超出我想像。」
 定欣多謝fans們一直以嚟嘅支持。
生日會以大熱電影《玩轉腦朋友2》做主題，影迷更即場畫出唔同嘅定欣肖像，非常得意。而問到定欣認為自己屬於邊種性格？佢就話：「我覺得會因為唔同環境而變成I或者E人，我鍾意戶外活動同朋友聚會，但有時人多或者陌生人嘅地方，阿焦就會出現，應該係當刻環境唔可能放鬆做自己，正在學習慢慢改變，唔好俾阿焦長期On panel，多給機會Joy（阿樂）主持大局，哈哈！」而稍後定欣會飛上海在與當地影迷一同慶生！

fans即場畫出唔同嘅定欣肖像。