武替道首映｜伍允龍生日串勁轟開兩導演 上畫日換劉俊謙牛一盼票房大收

新片《武替道》 星期一舉行首映， 劉俊謙 伍允龍 張達倫 杜燕歌 林耀聲 梁雍婷 車婉婉 吳瑞庭等都有現身，現場吸引逾千人圍觀，主角阿謙同Philip甫出場就令現場歡呼聲不絕。各位演員先於台上介紹片中角色，又提到同董瑋嘅合作感受。

以龍虎武師作主題嘅新片呢日舉行首映
Philip提到董瑋係自己非常尊敬嘅武指前輩，今次首次同對方銀幕上合作非常開心，而阿謙就難忘當年Dee哥同李小龍合作嘅作品，更指Dee哥喺在片場無私分享，大談影壇經驗冋武師技術知識。至於同為武師出身嘅導演梁冠堯同梁冠舜，又即場同Philip表演寸勁，Philip一拳就將兩位導演震飛倒地。
Philip呢日仲即場示範寸勁

首映當日係Philip生日，而電影9月26日上映當日就係阿謙生日，大會就於現場為兩位主角送上蛋糕，全場合唱生日歌祝賀。阿謙亦指生日願望電影票房有3000萬成績！至於Philip就話難得生日撞正首映禮，咁多人祝自己生日快樂，非常開心又大感神奇。
兩位男主角分別都係9月壽星，片方就為佢哋預先慶祝喇

首映完結後，劇組即拉大隊謝票，觀眾見到主角到場都非常興奮，Philip及後再同監製陳羅超到旺角戲院出席「伍允龍生日特典場」，壽星一抵達就大受觀眾歡迎，仲紛紛向Philip送上生日祝福同禮物。
大隊之後到戲院謝票，令入場觀眾非常驚喜

另外，《武替道》同Moviemarks今日起舉辦香港經典動作電影作品回顧展，回顧唔同年代經典動作電影海報，同時展出多位本地漫畫家將戲中兩位主角，威哥(伍允龍)同龍仔(劉俊謙) 穿梭港產片唔同時空，跳入經典動作片幻化為主角，對以往香港動作片致敬。

Philip呢日心情大靚，唔知同傳媒指佢蜜運中有冇關呢？