黃智雯自資追夢企劃為粉絲炮製驚喜 親自下廚兼開金口獻唱

黃智雯（Mandy）去年底離巢無綫後，近期活躍於個人社交平台，最近宣布播出半真人Show企劃，以追夢、勇氣及情緒宣洩等為題，希望透過今次企劃宣揚正能量，自資拍攝半真人Show節目，並暫定一連五集，早前佢喺網上作公開招募有關夢想及勇氣等故事，由籌集故事去到拍攝都落手落腳去搞。

黃智雯派驚喜，令Fans Leader非常感動。
半真人Show企劃開始前，黃智雯決定先為支持佢多年嘅Fans Leader實踐夢想，發放驚喜，為對方籌辦神秘生日派對，作為是次企劃前傳，黃智雯指呢位Fans以前驚驚青，到而家成為Leader，就好似自己以前好冇自信，但為追夢竟然有勇氣放棄空姐入行，入行後亦要有勇氣面對好多人、挑戰好多新角色。

黃智雯為粉絲親自下廚。
黃智雯籌備呢次神秘派對絞盡腦汁，除咗為粉絲們親自下廚，亦即場開金口獻唱多首歌曲，令粉絲既驚喜又窩心，黃智雯為今次驚喜事前準備咗一個月，黃智雯難得下廚卻笑料百出：「我係唔熟架步啫，加上對住鏡頭煮嘢食會特別緊張。」

黃智雯為粉絲作現場獻唱。
黃智雯自言平時喺屋企入廚定必關門，老公亦唔敢騷擾：「我煮嘢食好似冥想咁，要好寧靜，我通常都會關門，然後上網睇住食譜，自己一個人沉醉喺廚房，唔可以畀人騷擾。」問到老公對佢廚藝有咩評價？Mandy笑指婆婆同媽咪煮嘢食都好叻，一問就會教佢點煮，相信老公可以食到家傳味道。

黃智雯自言平時在家入廚定必關門，連老公亦不敢騷擾.。