馮允謙驚爆開騷期間流鼻血 仰頭邊吞血邊唱歌完成演出

馮允謙 一連3場紅館個場圓滿落幕，尾場吸引眾多好友支持，蘇志威帶同囡囡、梁釗峰、李幸倪等，仲有老闆林建岳博士都嚟捧場。Jay喺三場騷都傾盡全力演出，令全場歌迷投入，可以話得係超水準嘅發揮。

再次踏上紅館嘅馮允謙順利完成演出
Jay唔單止先後獻唱《遠在眼前》、《一步一悔過》、《給缺席的人唱首歌》、《在最好的時間做最好的你》等歌曲，嚟到尾場平日好理性嘅佢都突然感觸起嚟，情緒激動咁多謝Fans一直支持，先有機會第2次踏上紅館開騷，令佢真正享受舞台，最後Jay不捨歌迷兩度Encore滿足粉絲。
不過原來曾發生爆鼻血事故，當時佢繼續死頂演出

騷後Jay心情仍然興奮，佢好享受3晚嘅舞台演出，更自爆一開場冇耐就發生驚險事，喺換衫時突然流鼻血，曾經考慮過要暫停演出，但最終都頂硬上，有幾首歌都刻意昂起頭演釋，期間一邊吞血一邊演出，幸好順利完成。Jay更笑指自己冒住爆血風險唱歌，所以俾自己100分。
其中第二場由衛蘭擔任表演嘉賓

講到未婚妻Crystal特意返港連續三晚嚟睇騷，Jay喺首場騷已公開向未婚妻示愛，佢就甜笑表示只係咁啱，至於婚期方面，Jay話睇吓今年自己樂壇成績如何再作定斷。
Jay嘅未婚妻（右一)每晚都有到場支持

而喺第二場當晚Jay就邀請到衛蘭Janice做嘉賓，兩人合唱英文歌令全場聽得如痴如醉，Jay更自爆因為Janice而立下決心入行做歌手。