剪裁魔法師｜決賽展才華誕生三甲 梁詠琪蘇永康大讚天份洋溢

香港電視史上第一個推廣本地時裝設計師才華真人騷《剪裁魔法師》，經過五集嘅比拼後，五位本地設計師，終於殺入決賽，最終冠、亞、季三強高手誕生，冠軍由Kev姚子裕奪得，佢同時包攬評審團特選中性主題獎以及晚裝獎，係全晚大贏家，擔任Kev model既Juliana郭珮文都好戥阿Kev開心，出場時更加係興奮到「五體投地」添。

姚子裕獲得《剪裁魔法師》冠軍同中性主題以及晚裝獎
而亞軍由Kyle羅宇豪奪得，Kyle話宣布獲獎一刻，佢都喜出望。而Jackson王竣鋐就奪得季軍，能夠擠身三甲，Jackson都激動到差啲流下男兒淚呀，佢話好幸運有一個平台可以比設計師發揮所長。而Toki王韜棋雖然未能晉身三甲，但係就佢成功包攬評審團特選設計主題獎中式獎及環保獎，佢亦好感激擔任佢Model嘅張馳豪，完美演繹佢既作品。Timbee盧韋謙雖然最終未能獲獎，但係佢都好感恩有呢個機會，比佢自我挑戰。

羅宇豪獲得比賽亞軍
季軍得主則係王竣鋐

擔任評審嘅梁詠琪以及蘇永康都好戥幾位獲獎嘅設計師開心，大讚佢哋才華洋溢，仲鼓勵佢哋繼續喺呢個行業繼續發光發亮。

一班年輕設計師於比賽中發揮所長盡展才華