焚城｜群星化身消防員勇救末世香港 王丹妮魏浚笙挑戰高難度爆破場面

由劉德華、白宇、莫文蔚、謝君豪、王菀之（Ivana）、王丹妮（Louise）、廖子妤主演嘅災難大片《焚城》即將上映。電影以香港陷入核災為主題，而製作團隊亦喺近日陸續釋出連串預告以及製作特輯。喺最新預告中可見，香港遭受末世級災難蹂躪，幾百萬人生命危在旦夕，消防員抱犧牲自我精神，決心力挽狂瀾。

以香港遭腦核災難作主題嘅新片即將上映

戲中一眾消防員演員需要喺回收場拍攝多場動作戲，對體力、演技絕對都係一等一考驗！白宇、Louise喺其中一場爆破戲需要飛身落地，雖然現場碎石飛濺，但兩位演員全程都係親自上陣。魏浚笙就有一幕需要由貨櫃高處滑落，並喺櫃邊倒吊，拍攝期間雖然吊得雙眼通紅，不過Jeffrey仍然專注完成，展現專業精神。而喺文戲部分，眾人嘅表演極高層次，既表現出常人面對末世困難時嘅恐懼同無助，但更要堅守消防清神為市民奮戰到最後一刻，展現消防員無畏無懼一面。 

多位扮演消防員嘅演員展現出佢哋嘅無私犧牲精神

而喺電影製作特輯「建構末日」，就向大家展示戲中其中一個主要拍攝場地，就有高放射性廢物洩漏嘅電子廢物回收場搭建過程。由於回收場係電影中災難嘅重要背景，劇組要喺多個不同地方搭建，一共佔地達3公頃，又用上過百噸鋼材同150多架廢棄車輛，現場布滿貨櫃、大量電子廢物道具，回收場遭爆破後變得滿目瘡痍嘅布置亦非常逼真，華仔驚嘆：「係我近期喺香港，好少拍到一部咁高質量嘅電影，每個景都有自己唔同嘅地方。」 

幕後團隊仲精心重現意外地點回收場

電影另一重要場景，就係是政府內部決策室以及地下指揮總部。總部場景細緻入微，按原本政府設計搭建，戲中演財政司司長政治助理Kelly嘅Ivana對此大加讚賞：「我哋入到地下室拍嘅時候，見到每一張紙、每一支燈都有精心設計，個場景真係好靚。」演爆破專家嘅郭偉亮亦對儲水庫場景大感驚訝：「每一次嚟到個set，我都係『嘩』一聲，荷里活鉅作，好震撼，同埋我覺得原來香港嘅場景、佈景製作人員好鬼勁抽。」

華仔激讚幕後人員嘅功力十足

據導演潘耀明透露，儲水庫場景喺大型廠房中搭建，從構思到拍攝足足歷時半年。 電影拍攝場景遍佈全港多處，亦包括消防局、舊政府總部廣場等地，為追求真實效果，劇組動員超過300人拍攝大型疏散場面，甚至喺未入住嘅住宅外圍取景。而劇組為求逼真重現醫院救援以及公路堵塞混亂場景，又起用大量臨時演員，並動用60多部車，力求呈現最真實的災難效果。而電影作為香港少有嘅大製作災難片，唔少得驚心動魄嘅爆破場面。除咗現場真火拍攝，仲有多場重頭爆破戲。其中一場「焚城級」嘅爆炸戲，更令觀眾猶如置身於將近毀滅嘅香港現場，非常震撼！