姚子羚相隔七年再同粉絲慶生 同粉絲齊睇出土舊作忽然爆喊

11月21號生日嘅 姚子羚 今年選擇同粉絲一齊提早慶祝生日，後援會仲準備咗一條好有心思嘅片段回顧子羚昔日嘅作品。同大家一齊睇返自己出道時清純外貌嘅子羚不禁會心微笑，不過睇睇吓，子羚越嚟越感動，當大家為佢大合唱《至少還有你》時，子羚仲感動到不斷落淚。

姚子羚時隔多年後同Fans慶祝生日，仲獲大家送上精心剪輯片段
有一班喺演藝路上一直支持自己，陪自己成長嘅粉絲令子羚相當感恩，仲驚覺後援會經已成立咗15年，佢感謝大家細心記住自己每部作品，連佢自己拍攝過劇集《通天幹探》都唔記得，衷心多謝大家記住佢演藝路每個瞬間。
Elaine期間仲一度感觸落淚，非常感激Fans支持

原來子羚已7年未同粉絲一齊慶生，見到有唔少粉絲喺外地來港出席，佢亦好多謝大家支持。聽到有粉絲每次買機票由馬來西亞飛來香港快閃為支持自己，子羚坦言呢份愛係無價之寶，佢份外珍惜。
呢日仲有部份外地Fans專程來港參與，令佢更為感動

入行20多年嘅佢，仲認為同胡說八道會幾位閨密嘅友誼更為難得，雖然好姊妹各有各忙，但係一到有人生日大家會齊集慶祝。繼早前為 胡杏兒 同 胡蓓蔚 兩位11月壽星慶生之後，定欣經已約定為子羚再辦生日飯局。子羚仲透露12月會開拍之前喺節目巡禮中經已公布嘅新劇，又預告仲會同一大班女演員鬥戲。