姚焯菲小出走準備強勢回歸返港 身形氣色回勇少女腿乍現

喺新西蘭讀書嘅 姚焯菲 早前自爆終於完成考試出關，日前佢更貼出去旅行嘅靚相自報行蹤，相信係趁返港工作前「小出走」充電喇。見到Chantel去到新西蘭嘅郊區，喺奧特亞羅瓦打卡，去咗小型飛機場，又親親羊駝，玩得相當開心。Chantel更以英文留言話:「finally experiencing the peaceful side of Aotearoa(終於可以感受奧特亞羅瓦平靜的一面)」

早前努力考試嘅Chantel終於可以放鬆休息
雖然南半球逐漸步入夏季，不過Chantel就依然著住羽絨背心，不過貼身運動裝下嘅佢似乎就瘦咗唔少，一雙修長少女腿乍現，可能係之前應付考試嘅壓力水腫都統統拜拜喇。Chantel另一張相素顏上陣，氣色同皮膚狀態都超好，期待元氣滿滿嘅小公主快啲返港同小菲象見面， 而好姊妹詹天文亦留言表達掛念，Chantel亦回應話自己都係一樣。

身形睇落仲比之前纖瘦

到處郊遊觀光充電增廣見聞

據知Chantel12月會返港工作，而一班小菲象呢輪喺網上就召集大家去佛山支持Chantel嘅跨年演出，因為Chantel同聲夢好友林智樂、何晉樂、潘靜文會參加內地嘅一個港樂馬拉松音樂嘉年華演出，同場仲會有許志安、側田、Gin Lee、王菀之、江若琳等。小菲象到時又要準備三寶去支持偶像。

活動嘉賓名單仲曝光Chantel好快就會再同大家見面