黎瑞恩着重愛情無悔離婚抉擇 陷人生低潮爽快退出：唔開心就Bye Bye

黎瑞恩（小恩子）喺2014年與曾憲梓兒子曾智明離婚，當年傳小恩子老公喺廣州包養小三逾2年等傳聞，小恩子成為單親媽媽獨力照顧一對仔女曾凱栭（Sheree）同曾浩儒（Tyrone）。小恩子近日接受網台節目「豐陳三俠」訪問，與主持周國豐、陳淑蘭同陳淽菁，談及愛情與事業嘅選擇，小恩子直言個性係要斬就即刻斬，絕不拖泥帶水！

黎瑞恩女兒曾凱栭，今年已經20歲，盡得媽咪真傳。

黎瑞恩2002年與曾憲梓三兒子曾智明結束七年的愛情長跑並退出樂壇，婚後育有一女一子。
小恩子坦言由細到大好着重愛情：「好奇怪㗎！譬如我同呢個人拍拖，分咗手唔夠一個月，我又好快有男朋友，好快又有一個人出現。」小恩子甘願當年為愛情放棄事業，可以話係愛情飲水飽，小恩子話自己性格係決定咗就去做，要斬就即刻斬，並唔會拖泥帶水，亦冇後悔過，認為人生每一條路都係自己揀，而家就算離咗婚都可以唱番歌，覺得上天係有安排。

小恩子坦言由細到大好着重愛情，但做事從不拖泥帶水，亦冇後悔過。
小恩子直認離婚時期算係人生低潮，但自己好快決定退出呢段關係：「算係低潮，我好快就決定咗退出，本身就唔可以接受呢件事發生，唔好嘥時間去唔開心，我仲可以做幾多年人，我都咁大仲有幾多年可以玩，唔開心就Bye Bye！」 

小恩子直認離婚時期算係人生低潮，但自己好快決定退出呢段關係。