StarTalk一氣呵成版｜演唱會拒唱首本名曲 肥媽黑妹友情牢不可破

肥媽Maria Cordero同黑妹李麗霞，嚟緊將會孖住一齊開show，不過喺揀歌方面都幾頭痛吓，呢日兩位上嚟《StarTalk》 接受 王鎮泉 訪問時，都有預告呢次演唱會嘅歌單有別以往，黑妹直頭形容肥媽揀歌好黐線，足足揀咗13次先落實到歌單流程，肥媽解釋係因為自己好認真，加上呢次演唱會係唱好香港，所以加入香港嘅元素同情懷，同年紀嘅觀眾希望佢有懷舊感覺，而後生少少嘅觀眾亦希望佢哋從中得到共鳴，所以肥媽呢次係唔會唱首本名曲，希望帶比觀眾一份新鮮感，包保觀眾會好驚喜。
黑妹同肥媽嚟緊會一齊開騷。
肥媽同黑妹都咁有號召力，所以每次開演唱會，都有唔少朋友託佢哋買飛，講到呢度，黑妹突然話唔想同肥媽講嘢，仲話佢黑人憎喎，原來係因為朋友叫親肥媽安排一啲握手位時，佢都會將呢個波交比黑妹，搞到黑妹都好頭痛。雖然黑妹把口就話肥媽黑人憎，但其實佢兩人嘅友情真係好深厚，無論高山低谷，佢哋都互相扶持，肥媽話大家一患病，都一定係第一時間通知大家，肥媽有病，黑妹就火速趕到醫院，黑妹有病，肥媽就火速去煲湯，絕對係患難見真情，對於面對大大小小嘅病痛，肥媽就好樂觀去面對，覺得只係上天比嘅少少考驗，所以而家佢話學識ENJOY生活先最重要。

肥媽透露今次演唱會會加入好多香港情懷。