破．地獄｜千人慶功子華Michael獲贈名貴禮物 導演指加長版有望賀歲檔問世

以生死之別作題材嘅熱播電影《破．地獄》，累積票房達到1.4億港幣，一舉成為香港最高票房華語電影， 許冠文 同 黃子華 等一眾演員，呢日就齊齊參與千人慶功宴，電影公司老闆 楊受成 仲逐一向電影團隊送上金牌答謝，至於兩位男主角Michael同子華，更獲贈名錶同紅酒。

《破．地獄》一眾成員參與千人慶功宴
子華同Michael話晒都係兩大香港笑匠，呢日就幽默提到禮物名貴，同收到之後要好好收藏咁話喇。正參演舞台劇嘅子華，受訪時仲話冇諗到電影成績會咁理想，覺得非常幸運，仲話原來全片演員得 朱栢康 估嘅票房最接近，所以合照時人人都比個Like讚佢神準喇。
子華同Michael指希望真正再合作一次笑片

子華仲話，希望每一部電影都有好票房，到時自然影業蓬勃，而Michael就希望2025年全香港市況都「破地獄」，繼續繁榮盛世。

電影希望在世嘅平凡你我都學會釋懷，而Michael就希望一圓心願，以大家熟悉嘅幽默搞笑，同子華正式合作一部笑片，將歡樂帶予香港每一位市民，子華仲希望3年內成事呀。
衛詩雅先前指票房破1.2億就會唱歌，不過呢日就似乎打算走數喎

影片成績勢如破竹，早前承諾衝破1.2億就會開金口嘅女主角 衛詩雅 ，就有意走數唔認數，仲賴話 林家謙 唔肯教唱歌，所以認為自己歌喉已經無藥可救呀。
導演陳茂賢指加長版本有望於新年期間推出

今次電影成績極為突出，仲有人提議原班人馬再開新作，身為投資者嘅楊受成就話照導演 陳茂賢 意思決定，至於之前一直有傳將推出嘅加長版，導演就話有機會賀歲檔期上映喇。